Baghmara, Sept 28,2024: India a·song gimikon matchu den·aniko champengna miksonge dolsa Hindu manderangni Shillong songjinmao re·jomaniko ong·atna tik ka·aniko South Garo Hills a·jani Social Activist Greneth M Sangma-ba raken jegalataha.

Jagadguru Shankaracharya Swami Avimukteshwaranand Saraswatiji Maharaj-ni dilanichi a·song gimikon matchu den·aniko champengna gita ma·mongo niamko ra·gatchina dabiengani bidingo janapatenba, Meghalaya a·doko dingtang dingtang Kristianrangni tom·tome songdonganiko kajia ka·na jotton ka·ani ong·enga ine Greneth Sangma parakataha.

“India a·songo matchu cha·aniko champengna jotton ka·aniara Meghalaya a·doko songdongenggipa manderangni jakgitele aro tom·tome janggi tanganiko so·sojengjeng ong·atna jotton ka·anisa ong·enga. India-ni Salgro salaram a·dokrango songdonggipa Kristianrang pilak torom aro bebera·anikon mande ra·a, indiba a·doko tom·tome songdong a·chaaniko indake golmal kajia ka·na chinga on·jawa” ine Greneth Sangma parakataha.

A·chikrangni daka rikanianio matchurangara namen mongsonggipa ong·a, A·chikrangni bia ka·ani, tom·bimongani aro uandake dingtang dingtang kamrango A·chikrang matchu be·enkon cha·bata aro indake manderangni matchu cha·aniko champenganiara a·songni manderangna on·gimin jakgitelaniko champenganisa ong·enga ineba Social Activist parakataha.

Meghalaya a·doko matchu cha·aniko champengna miksonganiko manderangni bil aro jakgitelaniko re·badena man·jana gita raken nirok sandianirangko dakchina ua sorkario dabiangaha aro iako manigija dakdragenchimode, a·doko songdongenggipa manderang pilakan ku·cholsan ong·e dakgrikgen ine mikrakataniko on·ataha.