Shillong, Aug 30,2024: A·doko songdongenggipa manderangna ku·rang on·ani aro warachakanian dilgiparangni mongsonggipa daito ong·a, ine Assembly-ni gital Leader of Opposition (LO) dolni dilgipa Dr. Mukul M.Sangma Bristibar parakataha.

Opposition dolni gital dilgipana seokako man·ani ja·man, kobor ra·timgiparangna aganengon, sorkariko chalaianio manderangni nanganirangko chu·sokatna ku·rang on·anian Opposition dolni mongsonggipa kam ong·a ine Dr. Sangma aganaha.

“Opposition dol ong·e dongengon, pangnan a·doko songdongenggipa manderangni nanganirangna chanchie kamko ka·na nanga. A·doko songdongenggipa manderang mai dakgipa kamrango neng·nikanirangko chagrongbatenga, uarangko nie kam ka·na nanga” ine Dr.Sangma aganaha.

Seokako man·gipa dilgiparangni kamko janapatengon, seoke watatgipa manderangni mongsonggipa neng·nikani aro nangnikanirangko chu·sokatna kamko ka·na nanga ine Songsak-ni TMC MLA aganaha.

Meghalaya a·doko chagrongenggipa dingtang dingtang neng·nikanirang, mongsongbate lekka pora, an·seng baljokani aro manderangna janggi tangani cholrangko on·anian mongsonggipa ong·enga. Ia sal somoirango sanna bananirangko dakanio korosrang batroroengani a·selan manderang neng·nikanirangko chagrongna nangenga aro a·doko Megha Health Insurance Scheme (MHIS) gita dakgipa program-rang donggenchimoba, manderang sanna bananirangko ra·anio neng·nikanirangko chagrongna nangkuenga ine Opposition dolni gital dilgipa parakataha.

Dedrangna lekka porako on·anio dingtang dingtang nokdangrangni chagrongna nangenggipa neng·nikanirangko man·enga. “An·chingni Tribal nokdangrangode pangnan, dedrangrang bang·a aro ia dedrangko dal·atanio, mongsongbate bida budirangko on·anio an·ching bang·en neng·nikanirangko man·ronga,” ineba Dr.Sangma aganaha.

Dingtang dingtang bosturangni dam rakbatroroengani a·sel manderang namen neng·nikanirangko chagrongna nangtokenga ine Dr. Sangma suk ong·gijaniko parakataha.