Tura, Feb 3,2025: Re·anggipa Bristibar attamni -ni 5:30 ba 6 bajimango me·apa saksako ma·sina man·gijagipa manderang sak 6 chadrape dokaha.
Sandagre songni me·apa saksa Balseng Ch.Marak, Bristibar attamo an·tangni ripengskarang baksa roe, attamni 5:30 ba 6 bajimano Walbakgre bus neng·takram biaponi noktangona, Walbakgre sambao donggipa Niksenggittim gita Badagonggre songona dakonanggipa ramako re·bamitting sak 6 manderang ja·man ja·man motor bike ge·gittamo sak 6 manderang re·bae, Niksenggittim rama gongge-o sak 6 manderangoni sakgni manderang sambaona re·bae na·an Balseng-konba ine sing·ahani gimin, hoe angan Balseng ine aganchakaha. “Na·an boss-nade aro na·an Tura-o Hero dakenganade” ine aganaha. Balseng Marak angade, boss-ba ong·ja, hero-ba dakja, hajira ka·e cha·gipasa ine aganchakskaha. Ua sak 6 manderangoni sak 4-de rama kosako nigame, dongaiachim, indiba sakgni manderangoni saksade, ku·sikko ba·ra katipe, na·an seng·a dakengana ine agane, Balseng Marak-ni skoko changgittam jakchi su·ahani gimin, Balseng Marak-ba chakna amjae, ua sakgni manderangni dokako warachakaha.
Indake Balseng Marak-ko saksa dokmittingo sakgipin churichi su·ahachim, indiba rasong gnangbee churichi su·ako Balseng Marak mobile phone ra·bita gnang jakchi rim·sona man·aha, indiba uni jakko churi mataha. Indakmitting somaio gari bolsa re·bae light ching·ani gimin, rang·san ua manderang Balseng-ko wate katangaha. Indiba, ua manderang, “Na·a da·o jokoba changgipino jokjawa” ine ku·chingangaha ine Balseng Marak, kobor ra·timgiparangna aganaha.
Balseng Marak-ni aganani gitade, batanggipa sal somairangoba darang baksaba jegrika-ingrika aro dakgrika dongjachim. Indiba maini gimin, “Angako bobil dinge chadrapaha, chanchinan changpilajaha aro ua manderangko maming dakeba ma·sirikjaha. Uamangni angko ku·chinge donangani gimin, mikkangchi angni janggina kenchakani ong·enga” ine Balseng Marak aganaha.
Na·a FIR ka·ama ine sing·anina aganchakengon, “Anga manderangko ma·sijani gimin, FIR-de ka·jaha, indiba mikkangchi indakgipa obostarang ong·taijachina, Araimaile Thana-o kobor-ko on·e donaiaha” ine aganaha.
Indake ong·genchimoba, ua sak 6 manderangko sandie rim·enba, namgijagipa kamni kri uamangna kragipa sastiko on·china aro mikkangchi indakgipa obostarang sakggipin manderangni kosakoba ong·jachina, sandianiko dakpachina Balseng Marak pulisrangko mol·molataha.
