Tura, Sept 4,2024:West Garo a·jani Tikrikilla Block-ni ning·o donggipa, Kotchugre SSA-LP Skulni Headmaster aro Rakramgre NPP Executive Committee-ni Vice President name aro tik ong·e kamrangko ka·jani gimin, songni manderang aganpaoba bikpile songni manderangkosa ka·mikkenatpilaha ine Kotchugre songni Nokma baksa gipin sak 43 songni manderang, West Garo Hills a·jani Sub Divisional Skul Education Officer [SDSEO) cum District Joint Mission Coordinator-na badi ka·e lekka sedoataha.
Nokma aro songni manderangni badi ka·e sedoatgipa chittio janapatani gitade, SSA-LP Skulni Headmaster Jamspar A Sangma, bilsi 3 ja 6 mangonin kamona re·bajaha aro 2021 bilsionin da·alona kingkingba, Skul bi·sarangna Mid-Day-Meal [MDM]-rangkoba on·chipjaha ine parakataha.
Jamspar A.Sangma re·anggipa 2021 bilsini April jaonin, skulona re·bajaha. Indiba sakgipin skigipa Herina A.Sangma-kosa 2022-oni 2023 bilsiona skul ka·atskaha. Uni ja·mano ua skigipaba an·tangni palo gipin Alban A.Sangma-ko ia 2024 bilsi dipet da·alona kingking skul ka·atenga ine parakataha.
Jamspar A.Sangma Mid Day Meal-kosan dontongata ong·aijaha, indiba skul bi·sarangni uniform-koba re·anggipa 2021 bilsionin dontongataha. Indake, ia skul headmaster-ni kamna songni manderang suk ong·jae, Jamspar A.Sangma-ko kamona re·bapilchina songni manderang aganon, bikpile songni manderangkosa kragija kattarangchi, “Na·simang angni kosako maiko dakna man·gen, Angni kosako sana badi ka·gen. Angan Tikrikilla Block-ni Chairman aro Raksamgre NPP Executive Committee-ni Vice President ine dagrangpile, na·simang gimikkon CGI sheet sualna list ka·giparangko den·galgen ine ka·mikkenataha” ine songni manderang parakataha.
Uni gimin, iani bidingo nanga gita ta·rake ja·kurangko de·china aro niam gita bichal ka·e, sastiko on·a baksana kakket bichalko on·china Kotchugre songni Nokma aro songni manderang didiataha.
Jamspar A.Sangma, 2021 bilsini March jaonin register-rango soi ka·giparang melijaha, uni gimin 2021-oni 2024-ona nipilaniko dakenba, ua skigipani kosako raka ja·kuko de·e, niam git sastiko on·china SDSEO-ko mol·molatan baksa mikkangchi indakgipa obostarang gipin skulrangoba ong·jachina songni manderang didiataha.
