Gasuapara, June 14, 2025: South Garo Hills a·jani Gasuapara jolrango buringni mongmarang manderangna namen neng·nikaniko aro kenjagokaniko on·enga aro manderangni janggirangko bang·en gimaataha. Re·anggipa May jani 31 tariko, Gungre songni Nokmako National Highway (NH)-62 ramao mongma doke siataha. Sianggipa Nokma an·tangni demechikko hostel-oniko rimna re·angmitting somoio indakgipa a·selko chagronge janggitangko gimaataha.
Apsan daken June-ni 12 tarik Bristibar walni 12 bajimango, mongmarang jinma re·bae, Kondok songo donggipa manderangni nok jamrangko nosto ka·e, donangataiaha. Uamdake Sukrobar salni 2 bajimango Kondok songni me·apa saksako doke donangtaiaha.
Indake, changni chang Gasuapara jolrango a·selrang ong·engani gimin, Nokmarang re·anggipa antio jinma tom·e chanchirimaniko dakenba, Council of Nokma Gasuapara Circle-ni gita, a·dokni Skotong Minister Conrad K. Sangma-na chong·motan Forest aro Environment-ni Minister-na chitti sedoataha aro apsan chittikon South Garo Hills a·jani DC, SP, Wildlife Range Officer-na on·ataha. Indiba iani bidingo a·dok sorkari aro district administration maming aganchakaniko aro ja·ku de·aniko dakkuja, ine Nokmarang matnangataha.
Nokmarangni mongsonggipa dabianiara, ta·rake Gasuapara jolo Wildlife Range-ko songe on·china aro Wildlife
Range-ko songe on·na man·kuja dipet, temporary Wildlife Camp-ko on·enba, Wildlife-ni chel·chakgipa dolrangko watate, nirok simsakaniko songni manderangna on·china dabiangaha.
Unbaksana, joltangni NGO-rang, Wildlife-ni manderang baksa ia neng·nikanirangko maikai namatna man·gen, apsan ku·monge kamrangko ka·engon, “Chinga Wildlife Guard-rangni neng·nikanirangko nikna gita man·aha” ine NGO-rang parakataha.
South Garo Hills-o Wildlife Security-rang sak 13 rangsan dongaia aro ua security-rang Baghmara, Rongara, Siju, Gasuapara, Sibbari aro Cherengpara biaprango mongmarangko nirokna gita nangenga, indita dal·a areako sak-12 ba sak 13 wildlife guard-rangchi nirokna namen amsokgijani ong·a. Ua guard-rangoni permanent, wildlife security-rangde sak 4 ba sak 5 rangsan dongaia, bang·bata security-rangkon Muster Roll-o rakkigiparangsan dongaia. Uni gimin a·dok sorkari, manderangni janggiko naljokatna aro nok jam, bagan barirangko nosto ka·enggipa mongmarangoniko chel·chakna, chu·onga gita pangkamgipa wildlife security-rangko kamo rakkichina NGO-rang raken dabiangaha.
Una agreba wildlife security-rango chu·onga gita bosturangba dongja, indide, wildlife security-rang maikai mongmarangoniko chel·chakna man·gen, uarangko a·dok sorkari ta·raken nirokatna nangchongmota. Uamango mongmarangko a·rikgalna maming chol ba ostro dongja. Wildlife Security-rango chu·onga gita bosturang dongjaode, maidake mongmarangko sason ka·na gita man·gen, a·dok sorkari uamangna chu·onga gita bosturangko on·na namgachim. Uni a·selsa Wildlife Security-rangba neng·nikaniko man·enga ine NGO-rang parakataha.
Uni gimin a·dok sorkari ta·raken, ia neng·nikanirangko nirokatpachina aro Gasuapara jolo songdongenggipa manderangna chel·chakaniko on·pachina gitaba NGO-rang Skotong Minister-ko didiataha.
Ia dabianirangko knachakja ong·ode, dal·batgipa, India sorkariona sokangnaba donga ine janapatenba, Gasuapara jolo mongmarangni nangana bate manderangni janggiko gimaatengani a·selara, Angratuli Forest Reserve-o mamingba cha·anirang dongjani gimin mongmarang, manderangni bagan bari mi a·pal aro noko donggipa cha·anirangko cha·na gita nokrangko nosto ka·enga. Iandake matburingrangba neng·nikanirangko man·enga aro ka·namgijagipa mongmarangni a·sel, manderangni janggi tanganio namen neng·nikanirangko chagrongna nangenga ineba NGO-rang parakataha.
Uni gimin, a·dok sorkari matburingrangna dingtangmancha maikoba dakna nangchongmotenga, mikkangchide manderang, mongmarangko warachakaniona sokgen, ine janapatenba, Gasuapara jolo indita sak manderangni janggiko mongmarang gimaataha. Indiba a·dok sorkari iani bidingo mamingkon ja·ku de·a dongkuja. Indide, mandeni janggiara gamchatjama? ma mongmarangni janggisa gamchatbata ine NGO-rang a·dok sorkario sing·doataha.
