Shillong, Feb 25,2025: Meghalaya a·doko ru·uta bilsirangna sason ka·gipa Congress dol, ia changni Khasi Hills Autonomous District Council (KHADC) election-o seat ge·sakoba cherikna man·jaha, indiba Jaintia Hills Autonomous District Council (JHADC)-ode seat damgittamko cherikna man·aha.

KHADC aro JHADC election-ni result-rangko parakatani ja·man, Meghalaya Pradesh Congress Committee (MPCC)-ni President Vincent H. Pala, kobor ra·timgiparang baksa agangrikengon, ia bilsini District Council election-o Congress dol chu·sokgipa ong·na man·jahaoba, Congress dolna chakpaaniko on·giparangna aro nama sikanirangko on·atgipa pilaknan Congress mittelpilaniko on·atskaha.

KHADC aro JHADC election-o susagipa Congress dolni pilak candidate-rangko mittelpilatengon, songadam nokadamrango manderangna kamrangko ka·angkuna, manderangni chel·chakna aro Meghalaya a·dokni pilak biaprangon namroro silroroanirang sokbachina Congress dol rakbee kamrangko ka·angkugen ine MPCC-ni President parakataha.