Shillong, Feb 28, 2025: A·songni dingtang dingtang kal·susaanirang jekai International aro National Level-rango kal·susae Medal man·gipa a·dokni chadamberangna sorkarini kamrangko on·na man·na gita, Meghalaya sorkari “Outstanding Sports Person Direct Appointment Policy, 2025”-ko ra·gatna Butbar salo Cabinet tik ka·angaha.

Ia policy ba niamko ra·gatani bidingo kobor ra·timgiparangna talatengon, re·baenggipa 2027 bilsio chang 39-gipa National Games-ko Meghalaya a·doko sokachakengani gimin, indakgipa kal·susaanirango bakko ra·enggipa chadamberang chu·sokgipa ong·china sorkari ia Meghalaya Outstanding Sports Person Direct Appointment Policy, 2025-ko ra·gatenga ine a·dokni Skotong Minister Conrad K.Sangma parakataha.

Ia policy-ko ra·gatanichi Olympic, Para Olympic, Special Olympic, Asian Games, Para South Asian Games, Common Wealth Games aro National Game-rango a·dokna Medal-rangko chee on·gipa chadamberangna, uamangni Medal-rangko cheani kri sorkarini kamrangko on·gen ine Skotong Minister parakataha.

Uni gimin je chadamberangan Olympic Game-rango Gold aro Silver Medal-rangko cheahachim, uandakgipa chadamberangde, Category-A-o ga·akgen, je chadamberangan Bronze Medal-rangko cheahachim, uamangde Category-B-o ga·akskagen aro je chadamberangan National Game-rango Gold Medal-rangko chegenchim, uandakgipa chadamberangba Category-B-o ga·akgen ineba Skotong Minister talatangaha.

Mitam kal·susagiparangde, poraiani gadang dongjani gimin, uandakgipa chadamberangnade kamna nangani kri poraiani gadangko man·na gita cholrangko on·skagen ineba Skotong Minister parakataha.

Ia namgipa cholrangko man·na gita, chadamberang kal·susaanirango krenge aro gisiko nange Medal-rangko chena gita jotton ka·china Skotong Minister chadamberangko didiataha.