Tura, May 1,2025: Meghalaya Assembly-ni Leader of Opposition (LO) ba warachakenggipa dolni dilgipa aro Songsak-ni MLA Dr.Mukul M.Sangma, Bristibar salo Jengjal Sub Divisional Hospital-ko niangaha.
Uni (Dr Mukul) Jengjal Sub Divisional Hospital-ko nieani miksongara, bang·a manderangni complaint-ko man·soe, Dr. Mukul Sangma baksa Rongrong-ni MDC Rinaldo K.Sangma, Baghmara-ni gitam TMC candidate Dr. Saljagringrang Marak aro TMC chadamberangni dilgipa Richard M.Marak Jengjal Sub Divisional Hospital-ona re·ange Doctor-rang, Nurse-rang aro ua hospital-o kam ka·giparangko gronge, manderangni neng·nikanirangko nigrike obostani kri kamrangko ka·china didiangaha.
Dr. Sangma-ni Jengjal Sub Divisional Hospital-ni doctor-rangko didiangani miksongara sagiparang aro ramao a·sel ong·giparangko attam 2 bajinj ja·mande name rimchaksojaenga aro mongsonbate, birth certificate tarigiparangko somoi ru·utatengani bidingo indake dakjachina, sagiparang manderangko je bajioba name rimchaksoenba sanna bananiko on·china aro birth certificate tarigiparangni list-ko ta·rie, list gita birth certificate-rangko on·china agan ku·pattiangaha.
Unbaksana, ramao a·sel ong·giparangko sanna gita Jengjal hospital-o Trauma Centre-ko dingtang donchina, sagiparangko dingtang emergency-o sanchina Dr.Sangma didiangaha.
Jengjal-o ge·gni Highway dongani gimin Trauma Centre dongna nangchongmota. Maina Tura-o donggipa Trauma Centre-ona ramao a·sel ong·giparangko ra·angode, hospital sokna skangan saniba janggi gimanaba donga ine agan-ku·pattiangaha.
Uarang gimikkon dakgen, ine Jengjal Sub Divisional Hospital-ni Skotong doctor ku·rachakataha.
