Tura, July 9,2025: Garo Hills Autonomous District Council (GHADC)-na Indian Constitution-ni Sixth Schedule-ni ning·o on·gimin bilrangko jakkalsretani a·sel District Council-ni mikkim rasongko ra·sekani gita ong·aha, ine Tura-ni MDC Bernard N Marak parakatenba, ia mikkim rasongko man·piltaina dakchakaniko on·china, a·dokni Governor CH Vijaya Shankar-na sedoataha.

Tura MDC-ni Governor-na sedoatgipa chittio parakatani gitade, ia niamrangko pe·aniara GHADC-na on·gimin bilrangkosan pe·ani ong·aijaha, indiba Nokmarangna on·gimin bilrangkoba pe·aha.

GHADC-o maming Official Gazette Notification gri “Assam Schedule”-ko ra·gatani a·sel, Garo Hills-o skangoni ja·rikbaenggipa a·a aro kajinani niamrangko pe·ani ong·aha. Ia niamko ra·gatanichi, Hill Mauza-rango Plain Mauza-rangko chalaina bilko on·aha ine Tura-ni MDC parakatenba, GHADC-o, Assam Schedule-ko ra·galsrangchina aro jatni bewalo songko nokko chalaina bilko on·piltaichina a·dokni Governor-ko didiataha.

Khasi aro Jaintia Hills-ni ADC-rango gita GHADC-ode, Tribal ong·gija manderangba, GHADC election-o susana cholko on·enga ine matnangatenba, GHADC election-o Tribal-rangsan bak ra·na man·na gita election-na nomination file ka·anio Scheduled Tribe (ST) Certificate-rangko on·china Marak, a·dokni Governor-ko mol·molataha.

Garo Hills-o songdongenggipa manderang, Scheduled Caste Certificate aro gipin nangchongmotgipa Certificate-rang, jedake Birth/Death/PRC/Affidavit-rangko GHADC-ni pal, sorkari office-rangonikosa ra·na nangengani gimin, ian Sixth Schedule-ni ning·o dongimin niamko pe·ani ong·a aro District Council-ko bilgriatani aro kajina man·aniko nosto ka·ani ong·a, ine Tura-ni MDC parakatenba, a·songni niam bidiko pangchake ia bilrangko GHADC-na on·piltaichina gitaba Marak a·dokni Governor-ko didiataha.

Garo Hills-ni Nokma A·kingrangko Municipal Board-na bil on·aniko bon·atchina, Education, Health, Forest, Transport aro Civil Works Department-rangko GHADC-ni ning·o donpiltaichina gitaba Tura-ni MDC, a·dokni Governor-ko mol·molataha.