Tura, Dec 20, 2024: Garoland State Movement Committee (GSMC) CEC HQ, Tura West Garo Hills-o Homeguard Traffic Volunteer-rangni man·na nangenggipa ja 5-ni dormaharangko ta·rake on·china a·dokni Home Minister aro Home Pulis Department-ko mol·molataha.
Indake ong·genchimoba, da·alona kingkingan Homeguard-rangni dormaharangko on·kujaengani gimin ta·rake Krismas-na skang da·al 19 tarik ba December 23 tarik Sombar salni gisepon Homeguard-rangni dormaharangko on·pachina GSMC CEC HQ, a·dokni Home Minister aro Home Pulis department-ko didiataha.
GSMC dilgiparangni parakatani gitade, a·dok sorkari jekon, Home Guard Volunteer-rangna salo gong 550 ka·e on·na gita tik ka·ahachim, ua dormaharangko da·onaba on·jaenga.
Uni gimin Home Guard Volunteer-rangni man·na nangenggipa chu·gimik dormaharangko Krismas-na skang ta·rake on·na nangchongmota ine GSMC dabiangaha.
Home Guard-rangni neng·nikanirangko niate, uamangni man·na nangenggipa dormaharangko on·genchimode, Home Guard ka·giparang Krismas-ko kusi ong·e manipana man·genchim, ineba parakataha.
