Tura, July 6,2025: Garo Hills Autonomous District Council (GHADC)-o GST Consultancy-ko rakkie una kror 8 gong tangkarangko on·na tik ka·e, Memorandum of Understanding (MoU)-o soi ka·aha, ingipani bidingo sing·sandianiko dakna, Special Inquiry Committee (SIC)-ko songani giminde namnikaha, indiba MoU-o soi ka·gipa apsan manderangkon SIC-ni member-rangna seokanikode ong·e nikja, ine parakatenba gital SIC-ni member-rangko songpiltaichina, Tura-ni MDC Bernard N.Marak dabie GHADC-ni Secretary-na sedoataha.

Iani bidingo talataniko on·china Sukrobar salo Bernard Marak-ko SIC okamataha. Indake ong·engon, Chartered Accountant-ni kamna Sumit Kumar Jain Bhora baksa MoU-o soi ka·gipa apsan manderangan SIC-ni member ong·ode kakket bichalko ra·bana man·jawa, Bhora-ko jokatnasa jotton ka·enga. Uni gimin SIC-ni member-rangde ruling EM ba party-oni ong·gijagipa aro jakgitel ong·gipa opposition dolonikosa SIC-ni member-rang ong·na gita nanga, uamangsa GHADC-ni namgnina kakket bichalko ra·bagen, ine Tura-ni MDC, GHADC-ni Secretary-na, EC-na aro SIC-ni member-rangna lekka seataha.

Marak-ni parakatani gitade, Sumit Kumar Jain Bhora-ni bidingo kakketko donmitapna jotton ka·enga aro Bohra an·tangko Professional ong·e a·kangenga, indiba ua class X-na bate poraidapa dongja aro TNT-ba dongja. Indide ua maikai Consultancy ong·na gita man·gen. Skia man·gipa A·chikrang, Sumit Kumar Jain Bhora-na bate poraigiparang bang·en donga, uarangko maina GST Consultancy-na rakkiskaja ine Marak sing·doataha.

“Sumit Kumar Jain Bhora baksa MoU-o soi ka·ani bidingo namedaken am·sandianiko dakna nangchongmotenga. GHADC-o kam ka·giparangna dormaharangko on·na man·jaengon, Bhora-nade gong kror 8-ko on·na MoU-ko soi ka·aha. Uni gimin, manderangni ka·dongchakna man·gipa mandeko donpilenba bilake am·sandianiko dakna nangchongmota” ine Marak dabiangaha.

SIC-ni sakgni membor-rangara, Convenor Grahambell A Sangma aro Documentation Officer Ashahel D Shira, uamangan MoU-o soi ka·anggiparang ong·a aro uamang Sumit Kumar Jain Bhora baksa bakrimgipa ong·a. Uni gimin uamangko Bhora-ni gimin, am·sandina Committee-ni member-rang seokanide kraani ong·jajok aro uamang Bhora-ni gimin kakket bichalko on·jawa, uamang batesa a·selko donnuna jotton ka·aigen, chong·mot a·selko parakjawa, ine Marak-ni Secretary-na seatgipa chittio parakataha.

MoU-o apsan nangchapgipa GST bangki dongkuenggiparangna Grahambell aro Ashahel sakgni jak dongpaa, uni giminsa man·gnigiparangko bariatna chanchienga, ine ua janapataha.

Member Secretary, Committee-o dongjani gimin, indakgipa dakgualanirangna kenchakanirang donga aro am·sandianiko ja·gitdotani donggen, unbaksana kam ka·aniko mikchepe ra·gen ine parakatenba, MoU-o bak donggijagipa member-rangko Committee-ni member-rang sektaichina Marak GHADC-ni Secretary-ko didiataha.

“Indakgipa ja·kurangko de·anio sakgipin manderang ja·chapgija am·sandianiko dakna nanga aro ja·ku de·anina sal somoirangko ra·dapangna nanga” ineba Marak dabiangaha.