Tura, Jan 15,2025: A·dokni skanggipa State University-ko South West Garo Hills a·jani Balalgre songo a·bachengate on·ani ja·mano
Garoland State Movement Committee (GSMC) CEC HQ, Tura-ni dilgiparang, a·dokni Skotong Minister Conrad K Sangma, Education Minister Rakkam A Sangma aro Higher & Technical Education-ni Official Ambruce Ch. Marak-ko grongenba, Captain Williamson Sangma State University-o Science, Commerce aro Arts Stream-ni mongsonggipa department-rangko kulichina dabiangaha.

GSMC-ni u·iatani gitade, ia State University-o Science Stream-ni mongsonggipa department-rang, jekai Artificial Intelligence, Robotics, Drone Technology, Nuclear Science, Advanced Biology, Advanced Chemistry baksana Physics, Biology, Chemistry, Zoology aro Environmental Science department-rangko kulichina, a·dokni Skotong Minister-ko didiataha.

Commerce Stream-ni dingtang dingtang department-rangko kulichina didiatengon, Auditing, Business Law, Finance, Cost Accounting, Business Management, Economic Development, Financial Accounting department-rangko kulichina gitaba GSMC didiangaha.

Garo Hills-o bang·bata chatro chatrirangan Arts Stream-ko ra·battokani gimin, Arts Stream-ni mongsonggipa department-rang, jekai Garo Language aro Literature, Arts aro Culture, Tourism Studies, Sociology aro Anthropology, Social Work, Music aro Performing Arts, Education unia Teacher Training, English Language aro Literature, History aro Peace Studies, Psychology, Library aro Information Science, Geology aro Geographical Information Systems department-rangko kulichina GSMC didiataha.

Captain Williamson Sangma State University-na kam ka·giparangko rakkianio, skanggipa joltangni candidate-rangnan cholko on·china GSMC-ni dilgiparang, a·dok sorkariko didiangaha. Ia gital State University-o Law Department-ko a·bachengatchina gitaba GSMC, a·dok sorkariko didiataha.