Tura, Sept 9, 2024: Garoland State Movement Committee (GSMC) CEC, HQ Tura September 8 tarik Robibar salo GSMC Garobadha Regional Unit-na gital dilgiparangko seoke on·angtaiaha. Adita jarangna skang GSMC Garobadha Regional Unit-ko dissolved ka·ahachim. Indiba mikkangchi Garoland State-na dabianio bilakbate kamrangko ka·angna miksonganio, GSMC Garobadha Regional Unit-ko gital songtaie, dilgiparangko seoke bilko on·angtaiaha.
Ia gital dilgiparangko seoktaie on·na gita GSMC CEC HQ-ni Acting Chairman Balkarin Ch.Marak, Assistant General Secretary Tony Balsam Ch.Marak, Finance Secretary Nikcheng Ch.Marak aro member Debirth M.Sangma re·ange, GSMC Garobadha Regional Unit-ni gital dilgiparangna bilko on·e donbaaha.
Gital seokako man·gipa GSMC Garobadha Regional Unit-ni dilgiparangara Ryan Ch.Marak Chairman, Dewan Ch.Marak Co-Chairman, Chanang N.Marak General Secretary, Nikrang G.Momin Assistant General Secretary, Pangsang Ch.Marak Publicity Secretary, Rongsil Arengh Information & Public Relations Secretary, Salniang A.Sangma Chief Organising Secretary aro Executive Member-rangara Saldo A.Sangma, Samar M.Sangma, Nikchang Cheran aro Jeckius Sangma.
Ia gital dilgiparang mikkangchi Garoland-na dakgrikanio apsan ja·ku de·e kamrangko ka·anggen ine parakataha.
