Tura, Dec 15, 2024: Garoland State Movement Committee (GSMC) Central Executive Committee (CEC)-ni dilgiparang December 12 tariko New Delhi songjinmaona re·ange, Garo Hills-o UPSC Exam Centre ba porikka sechakram biapko songe on·china mol·mole segipa chittiko UPSC-ni Chairman-na December 14 tariko on·eaha.

New Delhi-o donggipa UPSC Office-ona re·angipa GSMC CEC-ni dilgiparangara Acting Chairman Te Balkarin Ch. Marak, General Secretary Tony Tojrang B. Marak, Assistant Environment Secretary Silbath A. Sangma, South West Garoland-ni Chairman Trellingbirth Ch. Sangma, Executive Member-ranga Banang R. Marak, Jaswel Marak aro JA. Sangma ong·achim.

Indake ong·engon, GSMC-ni chittio janapgimin gita Garo Hills-o UPSC Exam Centre-ko kulie on·na ka·dongatani kattako on·ataha. Maina Garo Hills-o paraienggipa chadamberangni neng·nikanirangko namen ma·sia, mongsongbate Graduate aro Master Degree dakgipa chadamberang bang·oba, UPSC porikkako sepana man·jae neng·nikani ong·enga. Jekai gari para gamna nanganio, nokrangko para ra·na nanganio aro chel·e songrena nangani gimin A·chik A·songni chadamberang UPSC porikkako sena sikgiparang graduate aro Master Degree matchotgipa chatro chatrirang neng·nikaniko man·enga ine janapataha.

Garo Hills-ni bang·bata manderangan UPSC porikkako sena sikoba korosrangni bidingo neng·nikaniko man·ronga, maina Shillong, Guwahati, Delhi-ona re·ange chel·gipa biaprangosa UPSC porikkako sena nangenga. Basakoba Indiani a·palrangchi re·angesa porikkarangko sena nangenga. Uni gimin UPSC porikka sena sikgiparang neng·nikaniko chagronga ine GSMC-ni seatgipa chittio janapataha.

A·chik a·songo Master Degree aro Graduate ong·gipa chatro chatrirang hajalni hajal bilsianti baririkrikani gimin Garo Hills-o UPSC porikka sechakram biapko kuli on·na nanga ine GSMC CEC-ni General Secretary Tony Tojrang B. Marak, Memorandum-o janape seaha.

GSMC-ni gita Garo Hills-na UPSC porikka sechakram biap ba Exam Centre-ko UPSC-ni Chairman songe on·gen ine GSMC ka·donfaniko parakataha.

“Chinga Garo Hills-o skanggipa changna UPSC Exam Centre-ko Tura-o man·na ka·dongsoenga. Chinga apsan lekkakon an·chingni MP Saleng A. Sangma-naba UPSC Exam Centre-ko songe on·china dabie segipa chittiko on·aha” ine GSMC CEC-ni Assistant Environment Secretary Silbath A.Sangma parakataha.