Tura, Aug 29,2024:Garo Hills Autonomous District Council (GHADC)-o kam ka·giparang ja 34-ni dormaharangko fifth pay-o on·china dabie, re·anggipa August 19 tarikoni jingjengatengon, 7-gipa salo GHADC-ni CEM aro gimin EM-rang jingjengatenggipa dolko okamate agangrikaniko dakaha.

GHADC-ni CEM aro gipin EM-rang, Non Gazetted Employees Association (NGEA)-ni dilgiparangko baksa agangrikaniko dakanio uamangna jagittamni dormahako gitcham pay scale-o ba fourth pay-o on·na gita ku·rachakenba, jingjengataniko dontongchina aganaha. “Chinga na·simangna fifth pay-ko on·gen, indiba da·o iarangko kam ka·na bang·en nangkuenga. Uni gimin ia bilsi mangmangko chakchike sengkubo” ine CEM kam ka·giparangko mol·molaha.

Indiba GHADC-o kam ka·giparang re·anggipa August 19 tarikonin, fifth pay-ko on·china dabiengahani gimin, gitcham pay scale-ko ra·jawa ine jegalatenba, jingjengataniko dakangkuna tik ka·angaha.

“Chinga batanggipa somoirango chingni man·kugijagipa dormahana mangmangsan jingjengataniko dakronga, fifth pay-ko dabie jingjengata dongkuja. Indiba ia chango chinga dingtangmancha, Fifth Pay-ko jasa jagni ong·oba on·china dabienga. Uni gimin, da·o gitcham pay scale-o on·enggipa jagittamni dormahako ra·chakahaode, chasongnaba fifth pay scale-ko man·chipjawaha. I Indide, jinmarang maiko chanchia, gitcham pay scale-o on·enggipa jagittamni dormahako ra·genma, ra·jawa ? .a fifth pay-kon dabiangkugen, ine sing·on kam ka·giparang gimikan gitcham pay scale-ko ra·jawa, chingna gital fifth pay scale-kosa nanga ine dabiangtokaha. Uni gimin, chingni dabia gita Fifth Pay Scale-ko on·kuja dipetna jingjengataniko dontongjawa” ine GHADC-o kam ka·giparang parakataha.