Shillong, June 5,2025: Madhya Pradesh a·dokni tourist Raja Raghuvanshi-ni manggisiko man·ani ja·mano uni jikgipa Sonam Raghuvanshi-ko sandiengon, pulisrang, an·chi nanggipa raincoat kingsako man·aha, indiba ia raincoat-ara ua me·chikni ong·ama ong·ja uko name ma·sikuja. Iako Forensic-chi porikka ra·e niani ja·mansa raincoat-o an·chi nanggipa ong·ama ong·ja, uko ma·sigen, ine Budbar salo, East Khasi Hills a·jani Superintendent of Pulis (SP) Vivek Syiem parakataha.

SP-ni parakatani gitade, ua raincoat, Sonam-ni gangipa ong·ama ong·ja, uko pulisrang, video-rangoniko name niengkua.
Ia raincoat-ni size-ba 3XL-sa ong·a, da·o dipet ia raincoat-ara Sonam-ni ong·ama ong·ja, name aganna man·kujaenga.

Sohra jolo gimaenggipa Sonam Raghuvanshi-ko sandienggipa dolrang, Budbar salo, Weisawdong jolni diltugipa biaprangoniko sandiaha, indiba mikkarang jimbee waani a•sel name sandina man·jaha ine SP parakataha.

Mikkarang wagenchimoba, gimaenggipa tourist-ko sandiangkugen aro uko sandianio, NDRF, SDRF, Fire & Emergency Service, SIT, SOT aro jolni manderang gimik sak 50-60-na baten bak ra·enga ine Syiem aganaha.

Gimaenggipa tourist me·chikko sandianio pulisrang, NESAC-ni drone-ko jakkalengoba mikkarang simani a·sel, name sandina man·jaenga, indiba ia drone-ni dakchakanichi me·sani manggisikode man·aha ine SP aganaha.

Sombar salo sandie man·gipa manggisiko Mongolbar salosa post mortem ka·ahani gimin, post mortem report-ko da·o dipet man·kujaenga ineba SP parakataha.