Williamnagar, April 2,2025: South Garo Hills a·jao donggipa, Era A·ning songo Jal Jeevan Mission (JJM)-ni kamrang matchotaha ine JJM-ni sign-board-o seahaoba, chu·gimik kamrang matchotjahani gimin bang·a songni manderang chiko man·tokkujaenga ine Garo Hills Youth Solidarity (GHYS) parakataha.

Uandake JJM-ni kamrangko matchotgija kam ka·ani bidingo GHYS-ni President Endick Marak, Simsanggre, PHE Department RWS Division-ni Executive Engineer, JJM-ni Third Party Inspector-rang aro Era A·ning WSS, (Era A·ning Rongsa A·we Combines WSS)-ni contractor-ko Monggolbar salo Nongalbibra pulis station-o badi (FIR) ka·doangaha.

Marak-ni parakatani gitade, Era A·ning Rongsa A·we, WSS-ni ning·o song dam 4-na, chong·motan Rongsa A·we, Era A·ning, Mengkulgittim aro Agrenggittim songrangna JJM project-ko ra·gatahachim aro ua kamna tangka gong kror 5 batpile chamatahachim.

“Ua songrango bang·a nokdangrangan chi pipe-rangko man·tokkuja aro ia JJM-ni kamrangko matchotaha ine songni Village Water & Sanitation Committee (VWSC)-na pakwatmanoba nokdang ge 42-de da·onaba chi pipe-rangko man·tokkuja” ine GHYS-ni President parakataha.

Era A·ning songsaonikon, PHE department JJM-na nokdang ge 133-ko biming segataha aro ua ge 133 nokdangrangna chi pipe-rangko sale on·manaha ine ma·mong sorkarina Completion Report-ko on·ahaoba, nokdang ge 25-na baten chi pipe-rangko man·tokkuja ine GHYS matnangataha.

“Chinga ua songrangona re·ange nieaha aro ua songrangoni nokdang ge 42-de chi pipe-rangko man·kuja, ine chinga nikaha. Ia project-na chi tank-kiko Era A·ning songni kosakosa rikna nangachim, indiba korosrangko komiatna gita chi tank-kiko ka·maosa rikahani gimin song gimikna chiko sokate on·na man·jaenga” ineba Marak parakataha.