Tura, April 24,2025:Garo HIlls Environment Protection Society (GHEPS), Butbar salo chang 22-gipa Environment Awareness Program-ko Rongram C&RD Block, DFO Social Forestry Division Tura, Soil and Water Conservation (Territorial) Division, Tura, Asanang jolni dingtang dingtang Mondoli-rang baksa nangrime, Asanang Multifacility Hall-o ong·atangha.
Ua program-ona Meghalaya Assembly-ni Speaker aro North Tura-ni MLA Thomas A. Sangma mongsonggipa sokgipa ong·e, manderangna aro chatro chatrirangna mikkangchi A·chik a·songni Environment-ko namatpilna kamrangko ka·anio sakantian daitoko ra·e, nama ja·kuko de·angchina didianbbaksa ku·pattiangaha aro Meghalaya sorkari iana daitoko ra·e kamrangko ka·engani ineba aganangaha.
Unbaksana, Guest of Honour ong·e sokgipa Rongjeng-ni MDC, Henen R. Sangma GHADC, Forest and Environment Department-ni EM-ba program-o dongpae, A·chik a·songni Environment-ko namatpilna daitoko ra·e kamrangko ka·enga aro mikkangchi GHEPS baksa bakrime kamrangko ka·angkugen, ine agan aganangaha.
Tura-ni Soil and Water Conservation (Territorial)-ni Division Officer, Watershed Scheme-ni bidingo talate on·angan baksa maikai chiko tange rakkina kamrangko ka·na nangenga, uarangni gimin talatangskaha.
Apsandake, GHEPS-ni President Dr.Merril N. Sangma, gimaangenggipa do·o matrang aro sam bolrangko name ripingna aro simsakna namgani gimin ku·pattiangaha. Uandake, Soil and Water Conservation Department-ni gitcham Director aro GHEPS-ni Advisor Dr. KC Momin, game ge·e cha·anio maikai environment-ko nosto ka·gija nambata gama ge·aniko mikkangchi dakna nanga, uarangni bidingo agane talate on·angaha.
Bon·kame Rongram C&RD Block-ni BDO Cherime. R. Sangma-ba mikkangchi chiko tange rakkina, sakantini bakrimani aro dakna nangani gimin agane talatangaha.
Uandake A·chik a·songni environment-na Rev. Winderse R. Marak-ni ku·rangchi Isolo bi·e, tom·aniko matchotataha.
