Tura, Aug 30,2024: Association for Democracy and Empowerment (ADE) HQ. Tura, re·anggipa August 19 tarikoni duk chakbee an·tangtangni man·kugijagipa ja 34-ni dormaharangko on·china dabie jingjengatenggipa GHADC-o kam ka·giparangna chakpaaniko on·eaha.
ADE-ni President Dalseng Bira Ch.Momin, jinmana agan talatangengon, “Chinga ADE-ni gita, na·simangni 8-gipa salona kingking duk chake, jingjengataniko niksoe gisiko duk ong·a aro chake nioba, GHADC-ko chalaienggipa EC-rangni kamko chakna amjajok. Indaken, da·alo chingni gita ku·rang on·pana aro na·simang baksa duk chakrimpana re·baha. Da·o namedake niatgenchimode, GHADC-o kam ka·giparangsan iako dabiani ong·ja, indiba A·chik jat gimikan ku·rang on·ani ong·enga. Indake kam ka·giparangna dormaha on·gija, ka·sin ka·sin bon·chipate, GHADC-ko gimaatna am·engjok. Ong·jaode, maina indita bilsi dormaha on·gija donenga, ia kamra GHADC-ko gimaatna, policy kal·a ong·jaengama ripengrang?. An·ching iani gimin namen mikkrakna nangchongmotengaha. An·chingna pattigimin, Sixth Schedule-ko gimaatna siengjok. GHADC-ko gimaatode, an·chingna mai dongkugen. An·chingko ia Sixth Schedule-ni niamchin guari kadule, rakkienga ong·jaode, basakonin an·chingko gipinchini nappretbagiparang ga·kning ga·ripike galgnokchim, indiba da·alo Sixth Schedule donganichi an·chingko naljokatenga. Uni gimin, GHADC-ko ripingna A·chik jat gimik ku·rang on·na nangenga. Uni gimin hai an·ching jat gimik apsan ku·rang on·pana aro an·chingni GHADC-ko tange ripingna ja·ku de·angna” ine Dalseng Bira Momin A·chik jat sakantikon ku·mongataha.
