Tura, June 7, 2025: Garo Hills Autonomous District Council (GHADC)-o kam ka·giparang dormaha man·gija ja 40 batpilahaoba iani bidingo darangba ku·rang on·jaengani gimin a·dok sorkari aro NPP-chi chalaienggipa GHADC-ni Executive Committee-ko Rongrong-ni TMC MDC Rinaldo K Sangma sing·doataha.

GHADC-o kam ka·giparangsan ong·aigija, contractual doctor-rang, deficit aro SSA skulrango skigiparang aro dingtang dingtang department-rango kam ka·giparang, mitamde jagittam batpile an·tangtangni dormaharangko man·tokjaengani a·sel neng·nikanirangko man·tokenga ine Sangma parakataha.

A·dokni Skotong Minister an·tangde, dingtang dingtang manianirango bak ra·e, krorni kror tangka paisarangko koros ka·e roenga, indiba GHADC aro a·dok sorkarini dingtang dingtang department-rango kam ka·giparang dormaharangko man·tokjae, nokdangtangtangko chalaina man·tokjaengaha ine Rongrong-ni MDC, suk ong·gijaniko parakataha.

GHADC aro dingtang dingtang department-rango kam ka·giparangni dormaharangko on·na man·jaengani gimin a·dok sorkariko matnangatenba, “NPP-chi dilenggipa sorkari aro GHADC-ni EC, an·tangtangko ‘double engine government’ ine a·kangenga, indiba ramram manderangna bal bojarangko gatdapenga,” ineba Sangma parakataha.

Rongrong MDC-ni parakatani gitade, NPP-chi chalaienggipa sorkari, an·tangtangni ning·o kam ka·enggiparangnade dormaharangko on·na gisik nangjaenga, indiba ‘Consultant’ aro political-ni kamna seokgimin manderangnade tangka paisarangko nangana batpile on·e roskaenga.

A·dok sorkario tangka paisarang dongja ong·ode, maikai political appointee-rangna aro consultant-rangnade on·na man·skaenga? GHADC-o kam ka·giparang, doctor-rang, skigiparang aro dingtang dingtang department-rango kam ka·enggiparang, an·tangtangko on·kange manderangni namgnina dangdike on·tokenga, indiba sorkari, uamangnade dormaharangko on·na gisik nangskajaenga, ine Sangma matnangataha.

Indake mikkang nitee tangka paisarangko on·aniara a·doko NPP-chi dilenggipa sorkari aro GHADC-ko chalaienggipa EC-rangni mongsonggipa daitoko mesokani ong·enga. GHADC aro a·dok sorkarini dingtang dingtang department-rango kam ka·giparangni bangki dormaharangko ta·rake on·china, Rongrong-ni MDC didiataha.