Tura, Mar 25,2025: Garo Hills Autonomous District Council (GHADC)-o kam ka·enggiparang ja 39-ni dormaharangko man·kujaengani gimin, nokdangko chalaianio namen neng·nikaniko man·enga ine Non Gazetted Employees Association (NGEA) suk ong·gijaniko parakataha.
NGEA-ni President Brithen M.Sangma-ni kobor ra·timgiparangna aganani gitade, GHADC-o kam ka·giparang dormaha man·gija, ja 39 gapaha, da·o March ja bon·ahaode ja 40 gapgnok.
“Chinga changni chang GHADC-ni EM-rangko gronge, chingni dormaharangko on·pachina mol·molahachim, indiba tangka paisa donggijako pa·sike on·chipja. Chingna re·anggipa 2024 bilsini December jao jasa mangmangni dormahako on·aha. Indiba ia 2025 bilsi a·bachengaonin, da·onaba jasani dormahakoba on·kuja. Chinga bilsi a·bachengonin, dormaha man·jani a·sel, dedrangko skul admission ka·na, lekka ki·tap brena, cha·na ring·na aro salanti office re·rurana, tangka paisa dongjae namen neng·nikaniko man·enga. Gipinrangchiko sropaoba, chingna dormaha on·a tik ong·jani gimin, bang·bata manderangan tangka srona on·rongja. Indaken, GHADC-o kam ka·giparang darangonikoba tangka srona man·ja. Indakpile duk chakengoba, chingni neng·nikaniko ma·sichakja” ine Brithen Sangma aganaha.
“Chinga uamangni sengkubo inani gimin, uamango ka·donge aro uamangko mande ra·e sengaha, indiba GHADC-ni dilgiparang chingni neng·nikaniko ma·sichakja. Chinga tangka paisa dongjaoba, salantian office-ona re·bae kamrangko ka·e on·enga. Indiba chingni neng·skime kam ka·ani maming lap dongja” ine NGEA-ni dilgiparang aganaha.
GHADC-o kam ka·giparang jingjengataniko dakahaosa dormahakon on·enga, ranta ong·pilengjok. “Chinga chakchikna kra gitan chakchikjok. Indiba chingko kal·akesa roenga. Indide chinga baditako chakchikkugen, chakchike nioba man·jajok. Uni gimin chinga lekka sedona draatako man·aha. Chinga uamangna March 25 tarikoni sal 7 somaiko on·aha. Uni gisepon mamingba aganchakani dongjaode, re·baenggipa April 2 tarikoni sima ari donggija (Indefinite) office picketing ka·na tik ka·a” ineba Brithen Sangma aganaha.
Uni gimin, “GHADC-ko chalaigiparang chingni mol·molaniko knachakchongmotgen ine chinga ka·donga. Indiba chingni mol·molako knachakja ong·ode, chingni tik ka·gimin gita jingjengataniko dakna draatani ong·gen,” NGEA-ni dilgiparang parakataha.
