GHADC-o kam ka·giparangna dormaha on·na man·jaengani gimin GHADC-ko nambate chalaichina Rakkam didiata
Shillong, Sept 30, 224: GHADC-o kam ka·giparangna, Fifth Pay Commission-ni recommendation-o pangchake jasani dormahako on·na ku·rachakahaoba, ja 34-ni dormaharangko on·na man·kujaengani gimin, GHADC-ko nambate chalaiangchina a·dokni Education Minister Rakkam A.Sangma didiataha.
GHADC-o tangka paisana neng·nikarangko man·aniara, Executive Committee-ko chalaienggipa skangonin simsakjani a·sel ong·aha ine Rakkam Sangma parakataha.
GHADC-ko chalaigipa EC-rang simsakgija kam ka·ani a·sel, NPP-chi chalaienggipa EC-rang jako ra·na skangan Congress-chi chalaianggipa EC-rang GHADC-o kam ka·giparangna ja 20 ba ja 30-ni dormaharangko on·chipgija donangaha. Da·o a·dok sorkari GHADC-na tangka paisarangko on·e dakchakatengoba tangka paisana neng·nikanirangko bon·chipatna man·jaengaha ine Education Minister gitcham Congress EC-rangko dosi galataha.
Uni gimin GHADC-ko ta·raken dingtangatna nangenga ong·jaode, ma·mong sorkario ka·dongani gimagnok ine Sangma mikkrakataniko on·ataha.
GHADC-ko chalaianio MDC-rang, kam ka·giparang aro Nokma Sordar-rang apsan bakrime kamko ka·na nangenga ineba NPP dilgipa parakataha.
GHADC-o kam ka·enggiparangni dormaharangko on·na gita a·dok sorkari dakchakengani gimin, GHADC-o man·enggipa kajinarangko maina koros ka·skaenga ine Sangma sing·doangaha.
GHADC-o kajina man·ani chu·ongjaenga ong·ode, maibade ong·na nanga. GHADC-o kam ka·giparangan nangana bate dongama, ma kajina man·ani aro koros ong·anirang bang·batengama ine Cabinet Minister sing·doataha.
Sixth Schedule-ni chang 125-gipa Constitutional Amendment-ni bidingo janapatengon, ian District Council-rangna tangka paisarangko bang·bate dakchakani ong·gen ineba Sangma janapataha.
Rajya Sabha-o parakatgipa Constitution 125-gipa Amendment Bill 2019-ara, India a·songni Tribal a·jarango Autonomous District Council-rangko chalaina dakchakenggipa Sixth Schedule-ni Finance Commission-o nangchakegipa niamrangko taridapna sienggipa Bill ong·a. Ia bill-ko re·baenggipa Parliament-ni Winter Session-o ra·gatnaba donga ine Rakkam Sangma ka·dongsoaniko parakataha.
