Tura, Aug 20,2024: GHADC-o kam ka·enggipana namen aiao inmanbeani aro dukni ong·enga. Maina uamang ja 34-na kingking dormaha man·gija, neng·nikaniko man·engahani gimin, dilgiparangni kosako ja·ku de·na draatako man·aha. Indiba GHADC-ko chalaienggipa EC-rang kam ka·giparangko kal·ake roenga ine nikna gita man·enga.
Darang department-oba, kam ka·giparang GHADC-o gita ja 34-na kingking dormaha man·gija dongipa dongkuja, ian Meghalaya a·dokni Itihas-o skanggipa ong·enga ine nikna gita man·gen.
Indake ong·engon, GHADC-o kam ka·giparang, an·tangtangni man·gnina NGEA-ni gita aro ma·gipa dolni gita changni chang GHADC-ni EC-rangko gronge, an·tangtangni man·gni dormaharangko on·pachina, bi·e am·e niahaoba, GHADC-ko chalaigiparang EC-rang knachakteljahani gimin, Non Gazetted Employees Association (NGEA)-ni dilanichi re·anggipa July 30 tarikon GHADC-ni EC-rangna lekka sedoe, sal 12 somoiko on·ahachim. Indiba maming aganchakaniko on·jahani gimin, August 19 tarikoni 23 tarikona salbonga silent Sit-in Demonstration-ko Tura Govt. College field, Te·teng a·jao a·bachengataha.
NGEA-ni President Brithen M.Sangma-ni aganani gitade, bilsio jagni ba jagittamnikosan pangnan dormaha on·ronga. Ua tangkarang cha·na ringna, dedrangko skul admission ka·na, skul fee-rangko gamna chu·ongmanchaja. Unbaksana dormaharang maming baridapani aro man·dapani dongja, fixed ka·gimin gitcham, fourth pay-kosa on·ani gimin maming dakeba nokdangko chalaina chu·ongja aro namen neng·nikaniko man·a.
Uni gimin, “Chingni da·alo dabianide, chingna fifth pay-ko dormaha on·na nanga ine ja·ku de·aniko a·bachengataha. Chingna jagni ba jagittamni dormahako on·genchimoba, fifth pay-osa ra·chakgen, fourth pay-ko ra·chakjawa.Ia dabianiko knachakja ong·ode, chinga mikkangchi sima ari dongija Indefinite strike ba jingjengataniko dakanggen. Chinga da·alo salbongana sit-in demonstration-ko a·bachengataha. Uni gimin ia salbongani gisepo, chingna maming ka·dongataniko on·na man·jaode, chinga rakbata ja·kurangko de·e, jingjengataniko dakanggen” ine Brithen Sangma aganaha.
“Chinga pangnan an·tangtangni man·gni dormahana jingjengataniko dakna nangsimaia. Chinga jingjengataniko dakjaode, jagni ba jagittamni dormaha mangmangkoba chingna on·ja, uni gimin ia jingjengatanide ranta ong·pilengjok, indinaride dormaha on·nan u·iteljajok” ine NGEA-ni dilgipa aganaha.
“Chinga dilgiparangko pangnan mande ra·a, indiba, dilgiparang chingni duk mikchiko ma·sichakja. Chinga office re·na tangka dongja, indiba chinga chakchike ja 34-na dangdike on·aha. Chinga cha·a ringa gri okgimu chake office re·bana nangaha. Da·o bilsigittam ong·na sipile dormaha man·jaode, sawamancha chingna tangka sro-ra·chakna on·gen, darangba GHADC-o kam ka·giparangna tangka srona on·jajok kentokaha” ineba Brithen Sangma aganaha.
“Chinga GHADC-o kam ka·genchimoba, chingo maming ka·dongani dongja, chinga andalao janggi tangna nangenga. Chingni dukko chingasa ma·siaijok! Order-ni gitade, chingna fifth pay-ko on·china a·dokni Governor 2018 bilsion ge·etaniko on·ahachim, indiba chingna fifth pay-ko ong·gija, fourth pay-kosa jagni ba jagittamni dormaha on·e, kal·ake roenga” ine NGEA-ni dilgipa suk ong·gijaniko parakataha.
