Shillong, Sept 10, 2024:: Garo Hills Autonomous District Council (GHADC)-o kam ka·enggiparangna ja 35-ni dormaharangko on·kujaengani gimin, GHADC-o NPP-chi chalaienggipa Executive Committee (EC)-ko a·dokni BJP aro MPYC matnangataha.

Tura-ni MDC aro BJP-ni State Vice President Bernard N Marak-ni parakatani gitade, GHADC-o kam ka·giparangna 5th Pay Commission-ni Recommendation-o pangchake dormaharangko on·china re·anggipa, 2018 bilsion Executive Committee-na, ge·etaniko on·manaha, indiba da·alona kingkingba 4th Pay Commission-ni dormahakosa on·genchimoba matchote on·kujaenga. GHADC-o kam ka·giparangna tol·e ku·rachakaha ineba Marak, Executive Committee-ko matnangataha.

“Batanggipa 2018 bilsionin dormaharangko 5th Pay Commission-o tariahaoba, da·alona kingkingan kam ka·giparang 4th Pay Commission-ni dormahakosa man·enga aro ian ra·chakna man·gijani ong·a” ine Marak parakataha.

GHADC-o kam ka·giparangna uamangni man·gni dormaharangko on·china changni chang sedoatahaoba, a·dokni Skotong Minister Conrad Sangma, iani bidingo changsaba ku·rang on·kujaenga ineba Tura-ni MDC parakataha.

Garo Hills Autonomous District Council (GHADC)-ko mangrakbatatna gita ANVC, sorkari baksa songgigrikani bidingo Monitoring Committee-ni tom·aniko ong·atna gita Skotong Minister jechakaha. Skotong Minister Party-tangni manderangna aro nokdangni manderangna chanchiaigipa ong·a ine NPP-ko matnangatenba sorkariko rikanio BJP apsan bakrimgenchimoba, tangka paisa jakkalsretanikode nie dongjawa ine BJP State Vice President parakataha.

ADC-rangna chamatgipa tangka paisarangko Conrad Sangma-ni nokdang baksa nangrimgipa manderangsa tangka paisarangko jakkalsretahani a·sel, District Council-rangko chalaianio bang·en grorang dongaha, ineba Marak matnangataha.

Apsan daken, GHADC-o kam ka·enggiparangna ja 35-ni dormaharangko on·jaengani gimin, Meghalaya Pradesh Youth Congress (MPYC)-ba, NPP-chi chalaienggipa Executive Committee-ko matnangataha.

GHADC-o kam ka·giparangna ja 35-ni dormaharangko on·kujaengani gimin aro 5th Pay Commission-ni Recommendation-o pangchake dormaharangko on·kujaengani gimin, GHADC-o kam ka·enggiparang, Non-Gazetted Enployees Association (NGEA)-ni dilachi antigni batpile jingjengatahaoba GHADC-ni EC-rang maming aganchakaniko on·kuja.

“Ian Garo Hills-ni manderangna jajrengani ong·enga. GHADC-o tangka paisana neng·nikanirang batroroenga aro ia neng·nikanirangko Executive Committee namatna man·jaengaha. GHADC-o tangka paisana neng·nikanirangko namatna gitade, dilgiparangni gisepo tangka paisa jakkalaniko jinmao parakna nanggen aro skatang koros ka·aniko dontongna nanggen” ne MPYC-ni dilgiparang parakataha.

Uni gimin GHADC-o ong·enggipa obostarangko namatchina aro kam ka·giparangni dormaharangko ta·rake on·china MPYC, a·dokni Skotong Minister-ko didiataha.