Tura, April 16: Garo Hills Autonomous District Council (GHADC)-o tangka paisana neng·nikanirangko man·engani gimin
District Council-o kam ka·giparangna dormaharangko on·na man·jaengon, GHADC-o an·tangko Chartered Accountant (CA) ine tol·gipa mande saksana gong kror 8 tangkarangko on·aha ine Tura-ni BJP MDC Bernard N Marak parakataha.
Marak-ni parakatani gitade, Tura-ni Sumit Kumar Jain minggipa mande saksa, an·tangko GHADC-ni Chartered Accountant (CA) ine tol·enba, kajina gamaniko jakgitel watgen ine GHADC-ni official-rangna ku·rachakani, ja·mano ua mandeni gimin am·sandion, ua mandeo CA degree-ba dongja aro ua kamni gimin ma·sigipa ong·jachim ine ma·siaha.
GHADC-o kam ka·giparangnan somoi gita dormaharangko on·na man·jaengon, tol·gipa CA-na gong 8 tangkarangko chamaniara ra·chakna man·gijani ong·a aro ian manderangni tangkarangko jakkalsretani ong·a, ua mandena NPP-ni adita sak dilgiparang chakpaani a·sel, indita tangkarangko gamna nangaha ine Marak matnangataha.
Re·anggipa jani Session-o Taxation Department, gong kror 8 tangkarangko Consultancy Service-na chamaha ine parakani ja·mansa, tol·gipa CA-ni gimin ma·sie, house-o MDC-rang, jagokmanpilaha aro iani bidingo chanchichipe sing·doaniko dakahaon, jera ra·grikna somoiko bang·e on·jaha “Fine” ingipa kattakosan aganchake matchotataha ine Marak parakataha.
“Sumit Kumar Jain, angni conatituency-o dongoba anga una TNT on·ja. Ua GHADC-ni ruling MDC-rang gitan bilko jakkale, gong kror 8 tangkako on·ode kajinako watgen ine officer-rangoniko tangka ra·aha” ineba Marak matnangaha.
Marak-ni parakatani gitade, ANVC dolrang ma·mong aro a·dok sorkari baksa tom·tomanina soi ka·grikani ja·man, GHADC-ko nambatatna aro Garo Hills-ni development-na ma·mong sorkari gong kror 100.71 tangkarangko Special Package dake on·ataha. Indiba ua tangkarangko ong·gija jakkalaretaha aro GHADC-na maming namgniko ra·bagija, indin bangbango gimaataha. Indaken NPP-ni gitcham EC-rang, ma·mong sorkarina Utilisation Certificate (UC)-rangko on·na man·jahani gimin, uamangna gisik ra·atpiltaiani lekkako watataha.
GHADC-o kam ka·giparangna dormaharangko on·na man·jaengon, Taxation Department tol·gipa CA-nade gong kror 1 lak 20 tangkarangko on·aha aro adita sak ruling MDC-rangba gong kror 3.8 tangkani cheque-ko on·ahani gimin, bil gnanggipa authority-rangna Marak badi ka·doangenba, iani bidingo che·em che·em am·sandianiko dakchina didiataha.
Indita bang·a kajinani tangkarangko tol·e cha·bokgipa mandeni kosako niam gita dingtang dingtang section-rango pangchake rakgipa sastiko on·an baksa tol·gipa CA-ko GHADC-oniko ta·raken ra·galchina Marak CEM-ko didiangaha.
