Tura, Jun 21, 2025: Garo Hills-ni a·dok chigarangko, chong·motan a·aranhko nambate rakkina gita Garo Hills Autonomous District Council (GHADC)-ni ru·uta sal somoirangoni ra·gatna miksongenggipa, ‘Mission Aman A·song’-ko Meghalaya a·dokni Skotong Minister Conrad K Sangma Sukrobar salo a·bachengate on·angaha.
Ia Mission-ni ning·o, GHADC, Garo Hills-ni pilak Nokma A·kingrangko toe, map wa·reng sale internet-o dongnok aro ia Mission-ni ning·o GHADC-ni a·a toani aro wa·reng salaniko altubate ma·sina gita Nokma ge·antini a·arangko tiktak map wa·reng sale internet-o rakkignok. Maina British-ni chasongonin Garo Hills-ni a·arangko internet-o rakkie dona dongkuja, ian skanggipa ong·enga. A·ani record-rangko lekkarangosa map wa·reng sale rakkiahani gimin, lekkarang nosto ong·engaha aro cham·e bon·angengahani giminsa, Garo Hills-o donggipa Nokma A·kingrangko map wa·reng sale internet-o rakkignok aro mikkangchi uarangko nambate aro altubate ma·sina gita, ia Mission Aman A·songko a·bachengataha, ine GHADC-ni Deputy CEM Nikman Ch.Marak parakataha.
Ia Mission Aman A·songko a·bachengate on·anio a·dokni Skotong Minister Conrad K Sangma, jinmana aganangengon, Garo Hills-ni a·arangko nambate rakkina aro kamrangko altubatatna gita ia Mission-ko a·bachengatahani gimin, GHADC-ko de·mittele aganangaha.
District Council-ko nambate chalaina man·na gita kamrangko nambate ka·china gitaba Skotong Minister, GHADC-ni dilgiparangko didiangaha. Indake ia Mission-ko a·bachengatanio, West Garo Hills a•jani Deputy Commissioner Vibhor Aggarwal, GHADC-ni Chief Executive Membor (CEM) Albinush R Marak, Deputy CEM Nikman Ch Marak, MDC-rang aro official-rang dongpae bak ra·angtokaha.
