Shillong, Sept 28,2024: India a·song gimikon matchu den·aniko champengatna miksonganio Gau Dhwaj Sthapana Bharat Yatra ba matchurangko chel·chakna jinma re·jomaniko October 2 tariko ong·atna tik ka·engani gimin a·doko songdongenggipa manderang aro dingtang dingtang NGO-rangni jegalsoengako nike a·dok sorkari, Gau Yatra-ni dilgiparangko Shillong Airport-o bilonna on·jawa ine parakataha.

Re·baenggipa October 2 tariko ‘Gau Yatra’ ba matchurangko chel·chakna gita jinma re·jomaniko Shillong-o ong·atna manchidilenggipa Gau Dhwaj Sthapana Bharat Yatra-ni dilgiparang, Shillong Airport-ona sokbaenga ine koborko man·soani ja·man, Sukrobar salo Khasi Students Union (KSU), Hynniewtrep Youth Council (HYC) aro Hynniewtrep Integrated Territorial Organisation (HITO)-ni member-rang, Shillong Airport-ona re·ange, uamangko champengsona jinma airport-o tom·daksoahachim.

Hindu Yatra-ni dilgiparangko champengsona gita ritchani ritcha NGO-ni member-rang Shillong Airport-o tom·daksoahani gimin, so·sojengjeng ong·anirangko champengna Ri Bhoi a·jani District Administration, ua biapona sipairangko Magistrate baksa chel·chakanirangko on·na watataha.

Indake ong·engon, Hindu Yatra-ni dilgiparang September 28 tarikni 12 bajimango Shillong Airport-ona sokbaenga ine koborko man·soani ja·man, so·sojengjeng ong·anirang dongjana gita Hindu Yatra-ni dilgiparangko Shillong Airport-ona re·bana on·jawaha ine Ri Bhoi a·jani District Administration, NGO-rangni dilgiparangna u·iataha.

Ia Hindu Yatra-ni dilgiparangko Shillong Airport-ona re·bana on·jawa ine District Administration-ni ku·rachakani ja·man, dolgittam NGO-rang, ua biaponi re·angpiltokaha.

Indake dingtang dingtang NGO-rangni jegalsoanirangko nike a·doko maming so·sojengjeng ong·jachina a·dok sorkari Sukrobar salo tom·e chanchirimaniko dakenba, Gau Yatra-ni dilgiparangko Shillong Airport-o bilonna on·jachina Airports Authority of India (AAI)-na sedoatna tik ka·aha.

Tom·a matchotani ja·man kobor ra·timgiparangna aganengon, “Ri Bhoi aro East Khasi Hills a·ja damgnion maming so·sojengjeng ong·anirang dongjana gita Gau Dhwaj Sthapana Bharat Yatra-ni dilgiparangko Shillong Airport-o bilonna on·jachina sorkari, AAI-na sedoatna tik ka·angaha” ine a·dokni Chief Secretary DP Wahlang parakataha.

“Sonibar salo ua dolni manderang Umroi Airport-o bilonna miksongenga aro matchurangko chel·chakna gita jinma re·jomaniko ong·atna tik ka·aha ine chinga koborko man·soaha, indiba uamang re·jomaniko ong·atna gita da·onaba permission-ko ra·kuja. Uamang permission-ko ra·kujaoba, Sonibar salo Umroi Airport-ona sokbaengaha ine koborrangko man·soahani gimin ua manderangko Airport-o bilonna on·jachina, chinga AAI-ko mol·molatna tik ka·aha” ineba Wahlang u·iataha.

Uandake, East Khasi Hills aro Ri Bhoi a·jao jinma re·jomaniko aro tom·anirangko champengna gita BNSS-ni Section 163, (Section 144)-ko ra·gataha ineba Chief Secretary parakataha.

Chief Secretary-ni parakatani gitade, a·dok sorkari, Central Puja Committee baksaba iani bidingo tom·e chanchirimaha aro Central Puja Committee-de matchurangko chel·chakna jinma re·jomanio bakrimtokjaenga ine u·iataha.