Tura, Mar 9,2025: Meghalaya aro Assam a·dokni sima ario donggipa Garopara, Mallangkona A·chik songni manderangna, Rabha Hasong Autonomous Council (RHAC)-ni manderang namen neng·nikaniko on·enga ine songni manderang parakataha.

Garopara songni manderangni kobor ra·timgiparangna aganani gitade, Rabha Hasong Autonomous Council-ko Sixth Schedule-o napatna miksonganio, Rabha-rang population chu·ongjaengani gimin, Meghalaya-o chapatako man·gipa Garopara A·chik songko Rabha-rang ra·sekdrae, a·a Patta-rangko taridrana am·engachim.

Rabha-rang Garopara songko ra·sekdrana jotton ka·engon, Garopara songni ge-15 A·chik nokdangrang, Rabha-rang baksa melie A·chikskani kosako kajia a·botdilenga ine songni manderang aganaha.

Indake ong·genchimoba, Garopara songni manderang maming dakeba an·tangtangni songko Rabha-rangna a·a Patta-rangko tarina on·jawa. “Chingko Meghalaya-ni Skotong Minister Conrad K.Sangma-an, Meghalaya-o chapatna ku·rachakahani gimin, Garo Hills Autonomous District Council (GHADC)-ni ra·chakgimin ba Approval ka·gipa lekkarang donga aro chinga Meghalaya-ni a·a Pattarangko tarimanaha. Chingo chu·gimik Meghalaya-ni lekkarang donga, chinga maming dakeba Assam-ni a·a Patta-rangko tarijawa aro tarinaba on·jawa” ine songni manderang raken a·kangaha.

Indake, “Rabha-rang salantian, chingni songona re·bae manderangko dokna satna am·e dagrangenga, uni gimin Garo Hills-ni NGO-rang aro Meghalaya-ni Skotong Minister, chingko sinjetenggipa Rabha-rangni kosako ta·raken ja·ku de·pachina aro ku·rang on·e, chingna dakchakaniko on·pachina songni manderang mol·molataha”.