Shillong, Mar 3,2025: Tura Lower Babupara-o donggipa Garo Labour Corps-ni Cenotaph-ko gital dake rikna pe·e galani a·sel dingtang dingtang dolrang jegale, ua Cenotaph-ko apsan biapon rikpiltaie on·china aro gital Committee-ko songe on·china Skotong Minister-ko mol·molahani gimin, a·dok sorkari ua Cenotaph-ko gital rikpitaina aro Committee-ko dilna Cabinet Minister Marcuise N Marak-ko Committee-ni Chairman dake songe, on·angaha.

A·dokni Chief Secretary Donald P Wahlang-ni parakatani gitade, ua Committee-ko Cabinet Minister Marcuise N Marak, Chairman ong·e dilanggen aro ua Committee-o Arts & Culture-ni Director I Majaw Member Secretary ong·e, kamko ka·anggen aro unbaksana Meghalaya Assembly-ni Deputy Speaker Timothy D Shira, Arts & Culture Department-ni Secretary RP Marak, GHADC-ni Chief Executive Member Albinush R Marak, Semford B Sangma, CN Sangma (Retd MCS), Social Activist Sengrak D Marak, MPSC Member Babynna T Sangma, ABDK-ni President Beryl B Sangma, Narcylina Marak, Don Bosco College-ni Principal Fr. Januarius S Sangma, Dr. Ramona M Sangma, Bijoy A Sangma, Bernita R Marak, Dr. Angela W Ingty aro GHADC-ni Executive
Secretary Sam Ricardo R Marak, membor-rang ong·skagen.

Una agreba ua committee-o, dingtang dingtang dolni dilgiparang, chong·motan Dr. Merril N Sangma, Sume G. B Sangma, Sabina K Sangma, Dr. Cintholina B Sangma, Gredalson Ch Momin, Coffercil R Marak, Giribala G Momin, Lyndon Ch Momin, Balkarin Ch Marak, Cherian Ch Momin aro Happiniush R.Marak-ba membor ong·gen ine a·dokni Chief Secretary parakataha.

Ua a committee-ni dilgiparang aro Member-rang, A·chikrangni daka rikanirango nangchakrgipa biaprangko namdapatna ja·kurangko de·anggen aro indake A·chikrangni gamchatgipa biaprangko ripinge rakkina ja·kurangko de·anio agan ku·pattianirangko on·anggen ine Chief Secretary parakataha.

Ua kamo nangchakegipa pilak dolrang baksa ua Committee, agan-chanchirimanirangko dakanggen aro ua Committee, man·a dipet ta·raken report-ko a·dok sorkarina on·anggen ineba Chief Secretary parakataha.

Ua Cenotapha-ara, a·gilsak gimikni skanggipa dakgrikanio (First World War)-o an·tangtangko on·kange France a·songona re·anggipa A·chik pagitchamrangko gisik ra·na aro uamangko mande ra·na tarigipa, Cenotaph ba gopram ong·achim aro uko bilsiantian July-ni 16 tariko Garo Hills-ni manderang, ua biapo jinma tom·dake, pagitchamrangko gisik ra·e mande ra·pilskaaniko dakrongengachim. Ua Cenotaph-ko pe·na skang songdongenggipa manderang baksa maming ku·mongrimani gri district administration aro Tura Municipal Board gital rikna pe·e galani a·sel adita so·sojengjeng ong·aniko nikna man·aha.