Tura, May 2, 2025: A·gilsak gimikni dal·gipa dakgrikani (The First World War), a·baona A·chik pagitchamrangni France a·songchi re·ange bak ra·enba sigipa, A·chik Matgrikrangko gisik ra·e mande ra·na gita, uamangni bimingrangko see dongipa Ro·ong ba Cenotaph-ko Tura Lower Babupara-oniko gital dake taridapana pe·galani bidingo, Tura-ni dingtang dingtang Civil Society Organisation (CSO)-rang, jekai A·chik Youth Welfare Organisation (AYWO) aro Association for Democracy and Empowerment (ADE), namnikgijaniko parakataha.

Ia namnikgija jegalaniko mesokna gita dingtang dingtang State aro District-ko dilgiparangna seanichi parakatengon, namnikgijani a·selara, Garo Labour Corps-ni Cenotaph-ko tariani Project-na contract on·nani bidingo document-rang meligrikgijani gimin, ong·a ine u·iataha.

Koborko man·soani gitade, ia memorial ba gisik ra·na tarie dongipa biapko taridapani project-na gong kror 2 tangkarangkk on·ahachim. RTI ka·e nianio parakani gitade, tender notice-ko 2024 bilsini October 1 tariko on·aha. Indiba ia project-na tender galani 2024 bilsini October 18 tarikon matchotahachim, ine AYWO-ni President Sengbath Ch.Marak parakataha.

Iani bidingo CSO-rangni matnangani gitade, Tura Beldarpara-ni Dhurup Prasad, niam gita gipin jatrang 2% Earnest Money Deposit (EMD),-ni draft gri niam gita gipin jatrang 2% ko gamesa tender galna man·achim. Indiba niamko pe·e, 2024 bilsini November 14 tariko jasa batosa tender-ko galaha, uni gimin Dhurup Prasad-de niam gita tender galna man·jachim, ine AYWO President jegalataha. Ua (Prasad) Earnest Money Deposit-ko gamchenggija, project-ko man·na kraja aro uni dingtang dingtang document ba lekkarangko nigrike nion, EMD Status-o EMD-ni draft gri tender galaha ine mesokaha.

Indiba EMD-ni draft gri dongimin somoi ba salni jasa ja·manosa tender galaha ine RTI ka·anio ma·sina gita ma·ahachim. Una agreba, project-ni document ba lekka-o nangchongmotgipa Officer-ni seal aro soi dong’ja, “Chinga ia project-ni kamko ka·ani bidingo name tale sandina gita didiataha” ine AYWO, President taldapataha.
Iani pilak sakkiko nike, project-ni kamrangko ka·anirang chu·onggija baksa niamko pe·ani aro mandeko mikkang nitee contractor-ko baseani donga ineba Marak parakataha.

Ia pilak ong·a obostako seachi parakatenba, CSO- ni dilgiparang, bil gnanggipa authority-rang ia project-ko dontongate, kam ka·anirangko name sandienba niamo pangchake contractor-ko basee, dos dakgipa manderangko sandie, rakgipa sastiko on·china CSO dabiangaha.