Tura, Nov 12,2024:Gambegre by-election-na campaign ka·ani somoiko, mijal Sombar attamni 4 bajion bon·ahani gimin by-election-na skang konta 48-ni gisepo campaign ka·aniko 56-Gambegre (ST) Legislative Assembly Constituency-ni Returning Officer, BNSS Section 163-ni ning·o champengataha.

Gambegre by-election-na pu·onaniko knal November 13 tariko ong·atengani gimin, Sonibar attam 4 bajioni a·bachenge campaign ka·aniko ba jinma tom·anirangko, jinma re·jomanirangko Returning Officer champengataha.

Gambegre by-election-na kam ka·gipa dingtang dingtang political dilgiparang aro party worker-rang, jemangan Gambegre constituency-ni voter-rang ong·jachim, uamangko campaign ka·na dongimin somoirang bon·ahani gimin Gambegre constituency-oni re·angpilchina Election Commission ge·etaniko on·ataha.

Ia by-election-na skang konta 48-ni gisepo loudspeaker jakkalanikoba Election Commission champengataha.

BNSS-ni Section 163-ni ning·o mande sak 5-na bate tom·dakaniko ba apsan re·aniko champengatenba konta 48-ni gisepo, political dolrang ba candidate-rang, noksaoni noksaona re·roroe campaign ka·aniko champengjaenga ine Returning Officer talataha.

Lekka pu·onna a·bachengoni, pu·ona matchotani minute 30-na kingking niamni ning·o Exit Poll ka·aniko champengataha.
Ia niamrang, West Garo Hills a·ja gimikon ong·gen aro ia niamrang November 11 tarik attam 4 bajioni election matchotkuja dipetna ong·gen ine Returning Officer u·iataha.