Tura, Oct 25,2024:Ma·mong sorkarini on·enggipa dingtang dingtang scheme-ni namgnirangko songni nokni manderang man·tokjaengani gimin, ma·mongni scheme-rangko manderangna sokate on·anian BJP-ni skanggipa aro dal·batgipa miksongani ong·a. Iarangna rakbate ja·kurangko de·angna gita Bristibar salo, Bharatiya Janata Party (BJP)-ni candidate aro Tura-ni MDC Bernard N Marak, Gambegre by-election-o susana gita nomination file ka·aha ine Bernard N.Marak kobor ra·timgiparangna aganaha.
“Election-osan ong·aija, indiba anga pangnan songni nokni manderang, ma·mong sorkarini on·atenggipa scheme-rangko man·ama man·ja, sandianirangko dakronga. Mongsongbate Chinga BJP-ni dilgiparang ong·e, BJP sorkarini on·atenggipa scheme-rangara, manderangona sokama sokja, pangnan uko sandironga. Chingade darangkoba mikkang nitee kam ka·na man·ja, ma·mong sorkari je manderangnan miksonge dingtang dingtang scheme-rangko on·ataha, uko songni manderang pilakan man·na nanga. Chinga iarangko nambate kam ka·na gitasa anga da·alo Gambegre by-election-o susaenga” ine Marak aganaha.
Songni nokni manderang, BJP sorkarini Prime Minister Narendra Modi-ni on·atenggipa scheme-rangni gimin ma·sitoka ian by-election-o BJP-ko cheatna sienga ineba Marak aganaha.
“Gambegre constituency-ni bang·a songrangon BPL card, ration card, PMAY nok, ringani chi, sanna banani, skie ra·ani secondary skul aro manderangni man·na nangchongmotgiparangko man·tokjaenga. Manderangni nanganirangko ma·mong sorkaride on·ataha, indiba ia nanganirangko a·dok sorkari chu·sokatjaengani giminsa chinga dingtanganiko ra·bana ia by-election-o susaenga aro Gambegre-ni manderang, ia by-election-o BJP-ko seokchongmotgen” ine BJP candidate aganaha.
Ia by-election-o na·a chegenchimode, na·a skanggipa mai kamko ka·chenggen ine sing·anina aganchakengon, “Gambegre-osan ong·ja, Garo Hills gimikon, anga kangal cholgrirangna kam ka·gen. Ia salrango kangal cholgrirang sorkarini maming dakchakanirangko man·jae neng·nikanirangko man·tokenga. Chatro chatrirang scholarship-rangko man·jaenga, budepa butchumarang Old Age Pension-ko man·jaenga, MGNREGA-ni kamrangko ka·giparang tangkarangko man·jaenga. Uandake dingtang dingtang neng·nikanirangko man·tokenga. Uni gimin ia by-election-o angni dakgrikanide songni nokni manderangna aro kangal cholgrirangna, uamangni man·gnirangko sokate on·na miksonganian ong·enga” ine Bernard Marak aganaha.
NPP-ni dilenggipa MDA sorkario BJP bakrimoba, Garo Hills-o BJP-ni MLA saksaba dongjani a·selsa ma·mong sorkarini scheme-rangko a·dok sorkari ra·sekna jotton ka·engani giminsa, ma·mong sorkarini ra·gatgipa pilak scheme-rangkon kangal cholgrirangna sokatna gita Gambegre by-election-o susaenga ine BJP candidate aganaha.
Jal Jeevan Mission (JJM)-ni kamrang chu·sokjaengani gimin aro bijolini bill-rang nangana bate sokengani gimin, NPP-ni dilenggipa a·dok sorkariko sing·doangaha.
Ia by-election-o seokako man·genchimode, MDA sorkarinan chakaigenma ma dingtang dake re·mikkangskana miksongenga ine sing·on, ma·mongo BJP-ni dilenggiparang maiko nangnika ukon dakna nangaigen ine Bernard Marak aganaha.
