Chokpot, Feb 8,2025: Chokpot Civil Sub Division-ni ning·o donggipa Alagre Community Health Centre (CHC)-o bang·a neng·nikanirangko man·enga ine FKJGP Deku Circle parakataha.

FKJGP Deku Circle-ni dilgiparang, Alagre CHC-ona re·ange niahaon, Alagre CHC-ni ning·o ga·akgipa songrangni manderang bang·a neng·nikanirangko chagrongna nangenga ine nikna gita man·aha.

FKJGP Deku Circle-ni President Grimbal Ch Marak-ni parakatani gitade, Alagre CHC-o ambulance gari ge·gnian namjaha aro uko tarigija galchipe donenga. Indake ambulance gari namjani a·sel CHC-o kam ka·giparang ba staff-rang private ba personal garikosa para game jakkalskaenga aro ian kraani ong·ja.

Gnigipa, chirangko chu·onga gita man·jani a·sel, Alagre CHC quarter-o dongkame kam ka·giparang, sagiparangko sangipa aro dongtimgipa manderang bang·a neng·nikanirangko man·enga.

Gittamgipa, CHC-o bijoli nirokgiparangko dingtangmancha rakkijani a·sel bijoli nosto ong·ani somaio CHC-o kam ka·giparang namen neng·nikanirangko man·enga.

Brigipa, CHC compound-o donggipa retaining wall ba pakmako a·a be·dape nalarangko a·a dapani a·sel mikka wachini somaio chirang jokangna man·jae, hospital nokningona chi napenga. Indake CHC-o kam ka·giparang aro sagiparangna dongtimgipa manderang namen neng·nikaniko man·tokenga.

Bongagipa, Network namjani a·selba namen neng·nikani ong·enga. Maina da·oni chasongo manderangni nangchong·motgipa Mobile Network-an ong·a. Network namjani a·sel rang·gitik nangani somaio Alagre CHC-ni Doctor aro Nurse-rangna ta·rake kobor on·na gita man·jani gimin, namen neng·nikani ong·enga aro Network-ko tik ong·e watjaenga ine parakatenba, Alagre CHC-o manderangni nangchongmotgipa neng·nikanirangko ta·rake nirokatpachina, FKJGP Deku Circle, Chokpot-ni MLA Sengchim N.Sangma-ko mol·molataha.