Shillong, April 3,2025: Meghalaya a·dokni dingtang dingtang dolrang aro songdongenggipa manderangni suggestion-rang aro chanchianirangko ra·ani ja·man, State Reservation Policy (SRP)-ko nipiltaiani bidingo a·dok sorkarini songe on·gipa Expert Committee-ni report-ko re·baenggipa April 12 tariko on·na siengaha.
Expert Committee-ni report-ko chu·gimik tarimanaha aro ua report-ko April 12 tariko on·anggnok ine a·dokni Chief Secretary DP Wahlang,parakataha.
State Reservation Policy (SRP)-ni Expert Committee-ko Justice (Retd) Mool Chand Garg Chairman ong·e dilaha aro ua Committee-o Justice (Retd) Dr Satish Chandra, Prof DV Kumar, Prof Chander Shekhar aro Prof Subhadip Mukherjee mang member ong·e dongpaahachim.
Meghalaya a·dokni dingtang dingtang biaprangona re·ange a·dokni manderang aro dingtang dingtang dolrang baksa gronge agangrikanio, sandie man·ani bidingo chanchirimna gita Expert Committee, re·anggipa January jao Delhi-o tom·aniko ong·atangaha.
Reservation Policy-ko nipilna gita sorkarini songe on·gipa Expert Committee, Garo Hills, Shillong aro Jowai-ko man·chape a·dokni dingtang dingtang biaprango tom·anirangko ong·atangaha.
State Reservation Policy-o Khasi-Jaintia-rangna 40% percent, Garorangna 40% percent, gipin jatrangna 15% percent aro Open Category-o 5% percent-ko kangahachim, indiba re·anggipa bilsirangonin Khasi aro Jaintia Hills a·jani dingtang dingtang dolrang, Reservation Policy-ko gital dake taripiltaichina dabitokahani gimin a·dok sorkari, dingtangmancha Expert Committee-ko songe on·aha.
