Shillong, April 28,2025: Re·anggipa 2013 bilsion, Meghalaya a·doko niam gri koela bikotaniko National Green Tribunal (NGT) champengatahaoba, da·ona kingkingba Meghalaya a·dokni dingtang dingtang biaprango niam gri koela bikotkuengani gimin, Enforcement Directorate (ED), dingtang dingtang biaprangoniko am·sandianiko dakanio, salprakon ton 1200-mang koelarangko bikotengkua ine nikna man·aha.

Indake ong·engin, ED re·anggipa April 24 tarik Bristibar salo South Garo Hills a·jani Jadigittim aro Nongalbibra, Bongaigaon-ni Jogighopa, Tinsukia-ni Margherita aro Guwahati koela a·damrangona re·ange am·sandianiko dakangaha.

Am·sandianiko dakani ja·mano ED-oni koborna parakani gitade, South Garo Hills a·jani Jadigittim jolrango skang jakkalgipa turirangchi, niam gri koelarangko bikotengkua aro koela bikotanio, Manager-rang, Sardar-rang aro labour-rang jak donga ine nikna man·aha.

South Garo Hills-ni Era Aning aro West Khasi Hills-ni Goreng jolrango niam gri dam 20-na baten koela a·kolrangko chalaienga ine ED Official-rang parakataha.

“Batanggipa bilsi 10-na a·doko niam gri koela bikotaniko champengatahaoba da·alona kingkingan maming naljokani gri aro samtangtango ong·telaigiparangna bakrango nangchakeani gnang koelarangko niam gri bikotengkua,” ine ED parakataha.

Uandake, ED-ni am·sandianio, niam gri koela bikotanio jak donganina rim·a man·gipa manderangko joltangni pulisrangna pakwate on·angaha. Ua kamo, Meghalaya aro Assam a·dokni manderang jak donga ine janapatenba, ua manderang, Meghalaya a·doko niam gri koela bikotanirangko sima ari jol gita Assam-ona salangenga ineba ED parakataha.

Ua koelarangko niam gita bikotenga ine mesokna lekkarangko tariaha ine janapatenba, ua manderang, koela nokgiparangoniko truck bolprako gong lak 1.27-oni gong lak 1.5-mangona Commission-ko ra·enga ine ED parakataha.

Ua koelarangko Jogighopa-o donggipa koela depot-rango donenga aro ja·mano ua koelarangko ita so·na, iron & steel industry aro niam gri chalaienggipa koela so·ani karkanarangona salangenga ine ED parakataha.

ED official-rangni am·sandimitting somoio rim·gipa lekkarang aro dingtang dingtang koela a·damo kam ka·enggipa manager, koela nokgipa aro labour-rangni parakani gitade, ua koela a·kol damantionikon salprako bol 5 ba bol 7 truck garirango koelarangko salenga aro ua truck bolprakan ton 12-oni ton 16-ona niam gri bikotgipa koelarangko salenga ine parakaha.