Tura, May 2,2025: A·dokni Education Minister Rakkam A Sangma Sukrobar salo South West Garo HIlls a·jani Balalgre songo donggipa Captain Williamson Sangma State University (CWSSU)-ko re·bae nirokeaha. Ua State University-ni Vice Chancellor Dr. Vasanti Vijay Kumar-ko gronge, a·dokni chadamberang chubata gadango skie ra·aniko bilakbatatna sorkari raken kamrangko ka·enga ine aganangaha.

Unbaksana, Rangsakona-ni MLA Subir M. Marak-ba dongpae, State University-ni bidingo gimin aganangengon, ia jolni chadamberangna namen gamchatbegipa University ong·a. Uni gimin matchotgija dongenggipa kamrangko ta·rake matchotatchina didiangaha.

Ua tom·aniko dingtangmancha Security Guard-rangni kamna aro Nokma-ni dedrangna on·gimin kamrangni appointment letter-rangko, Rakkam Sangma, Education Eepartment-ni Adviser aro Rangsakona MLA Subir Marak-ni jakchi pakwate on·angjolaha.
Captain Williamson Sangma State University-ni dingtang dingtang kamrangko nipiltaina gita dingtangmancha a·dok sorkarini Secretary DD Sangma-ni dilachi Coordination Committee-koba songe donangjolaha.

Uandake, re·baenggipa May 7 tariko, ia State University-ni bidingo a·dokni Skotong Minister Conrad K Sangma baksa Shillong-o tom·aniko ong·taigen aro ia tom·anio a·dokni Education Minister aro gipin Official-rangba bak ra·anggen ine Sangma aganangaha.

Indake tom·a matchotani ja·man Captain Williamson Sangma State University-ni Registrar Ambrose Ch Marak, ia University-ni Academic Session-ko re·baenggipa August ja dipetan a·bachenggnok aro iana Syllabus, Curriculum aro Prospectus-rangko tarimanaha ine parakataha.

Ia State University-o bakrimenggipa pilak College-ni Principal-rang baksa tom·aniko ong·atgen aro College ge·antini result-rangko parakatani ja·man ba una skang Advertisement-ko on·gen ineba Marak parakataha.