Chokpot, May 28, 2025: Meghalaya Assembly-ni Leader of Opposition, a·dokni gitcham Skotong Minister Dr. Mukul M Sangma, Monggolbar salo Chokpot, Community Health Centre (CHC)-ona re·ange, mai neng·nikanirangko chagrongenga uarangko sing·sandie, uamangna ka·dimeatni kattarangko agane, Nurse-rang, doctor-rang aro songni manderang baksa agangrikangaha.
Chokpot CHC-ona sagiparangko ra·bana mitam songrangode ramarang dongja, uandakgiparangna MITP-ni gita World Bank-on tangka donga, uarangko jakkalna niam donga. Hospital, bajar aro skulrang re·giparangna rama tarie on·ani niam donga. Uni gimin, Hospital Managing Committee-rang uarangko niroke kam kana gita man·a, maina MITP baksa world bank ming angni chasongon, pilak kamrangko angan skie dongimin niam donga. Uarangko na·simang niroke kam ka·na aro jakkalna man·a, uasan ong·aija skulni managing committee aro bajar managing committee-rang, ua apsankon dakna man·gen ine Dr. Sangma aganangaha.
Rama jal·langna sorkario tangka chamgimin donga aro Hospital Managing Committee-rang meeting-rangko ka·jringe, CHC-o neng·nikanirangko agangrikchina gitaba didiangaha. Jedakode, kam ka·giparang neng·nikanioni olgrokna man·gen.
“Uamangni neng·nikanirangko anga bang·en ma·siaha, uni gimin anga sorkariko didigen. Manderangni pilak neng·nikanirangko okgrokatchina aro pilak CHC-o sanna bananirangko dangdike on·giparang mikangchi nama simsakanirangko on·china anga didie donbaaha” ine TMC dilgipa aganaha”.
