Tura, April 13, 2025: Meghalaya Assembly-ni warachakenggipa dolni dilgipa Dr.Mukul M.Sangma, Sonibar salo Tura Civil Hospital-o donggipa, Trauma Centre-ko niangani ja·man kobor ra·timgiparangna aganengon, Trauma Centre-ara dakna nangchongmotgipa ong·a. Ia Trauma Centre-ko Garo Hills gimiko Tura Civil Hospital-osan a·bachengatna man·engkua. Da·ororo ramarango a·sel ong·anirang bang·en donga, ramao a·sel ong·ani ja·mano hospital-ona sokbaon, chu·onga gita sana bananiko on·e janggiko jokatna man·na gita ia Trauma Centre-ko kuliaha. Ia tarigimin Trauma Centre-ko da·alo anga niaha, iana skangba niaha, baditana kingking chu·onge jakkalna man·enga, iako chu·onge jakkalengama aro iako tarianio pangchake chu·sokgipa ong·na man·engama, man·jaenga iako niaha. Kam ka·gipa manderangko chu·onga gita donama donja iakoba niaha. Ramao rasong gribee a·sel ong·eming saknaa man·giiparangko rimbaa ong·ode, ta·rake sanna gita iano team donggen, uni gimin team-rang chu·onga gita dongama dongja iarangko niaha. Indiba chu·gimik nanga gita ong·kuja, sanctioned ka·gimin post-rangko filled-up ka·kuja ine Dr.Sangma aganaha.

Minggipin, iano dingtangmancha Intensive Care Unit (ICU)-ko Trauma Centre-na on·aha, indiba iarangko jakkalkuja. Iarangko jakkalna dingtangmancha mande sanction ka·dapna nanggiparangko on·kuja aro iana complete skie ra·gimin team dongkuja. Uni gimin ia chu·onggijanirangko nikaha aro ia chu·onggijanirangko namdapatna nanggen ineba ua aganaha.

“An·ching gimikan ma·sia ramao a·sel ong·ani ja·manosa hospital-ona mandeni janggiko jokatna rimbaa, indiba ramao a·sel ong·giparangko champengna gita dingtang dingtang kam ka·na nanganirang donga. Uni gimin, ramao gari salgiparangsan ong·aigija, ja·achi re·giparang gimikan ramao maming a·sel ong·jana gita, kamrangko ka·na dingtang dingtang department-rangna responsibility ba daitoko on·gimin donga, ia kamrangko niamo pangchake chu·sokatna nanggipa kam ong·a” ine warachakenggipa dolni dilgipa aganaha.

Iana agreba, bal bojarangko chilna nanggipa department-rang, jekai Motor Vehicle Act, Disaster Management Act donga, basakoba saniba nokko wa·al kamode, burn unit dongna nanga, indiba iano burn unit-ko tarikuja aro dingtangmancha ramao a·sel ong·ani ja·mano bachi ra·anggen manderang u·ina nanggen. Uni giminsa ia Trauma Centre-ko tapna nanga, indiba Trauma Centre signboard-kon tapkuja manderang u·ina nanggen bano Trauma Centre donga, ramaoba signboard donna nanggen, Trauma Centre-ona badita chel·la ramaoba taprorona nanggen.

Uni ja·mano District Road Safety Committee (DRSC)-ni meeting-ko anga ong·atenga, DC, RDSC-ni Chairman ong·a. Ia DRSC-ni meeting-ko jao changprak ong·atna nanga, iano gimik department donga Pulis, PWD ramako tarigiparang badia ramao a·sel ong·enga, maini a·sel ong·enga, turning-rang badia ramao a·sel ong·batenga, mikot mikot record ka·e chimongenba meetingo discuss ka·na nanga. Uni gimin iarangko dakama dakja sandina nangenga aro dakkuja. Uni gimin iarangko maidake namdapatna man·gen, an·ching sakantian saoba ramao a·sel ong·e janggi bon·na nangode, duk ong·a ma·drang mahari gimikan. Ramao a·sel ong·e saknaa man·giparangko Tura Civil Hospital-onarara ra·baode ong·jawa, gipin district-rangoba Trauma Centre dongna nanggen ine Dr. Sangma aganaha.

Ia Trauma Centre-ko a·bachengate jakkalani ja·mano gipin district-rangoba, Trauma Centre-ko Williamnagar, Resubelpara-o, Ampati aro Baghmara-o kulina nanggen, ramao a·sel ong·anirang bang·a. Ia a·sel ong·gipa gimikko ianona ra·baengon, jeo a·sel ong·a uanoniko hospital ra·bana badita somoi nanga aro maidake ra·baenga aro maidakgipa ambulance-ko jakkalenga iarang gimikko nina nanga.

Gari a·sel ong·giparangko ra·bana maidakgipa ambulance-ko jakkalenga uko sandion, Life Support System (LSS) donggijako jakkalenga, indiba LSS donggipa ambulance-o ra·baode, saknaa man·gipa tange sokbanaba dongachim, unode doctor-rang janggi tangatna jotton ka·genchim. Uni gimin, indakgipa chu·onggijanirang bang·en donga. Iani a·sel basakobade saniba janggiko maming dakchakani gri nigake dongna ga·akenga ineba Dr aganaha.

Uni giminsa uko correct ka·na nangenga. Iako correct ka·na gita dongimin niamrang donga. Ia niam mikot mikot sea donga, ia niamko ja·rikna nanggen. Niamko ja·rikjaode aro an·tangni daitoko name ka·jaenga ong·ode, uamangko action ra·na nanggen. Ia Trauma Centre-o jerangkon sorakrioniko nangenga, uarangko on·ama on·kuja,nian baksana rama jal·langrango jeon a·sel ong·simsimenga, gari salgiparang banobade, na·a name gari saloba, mikkangchini re·bagipa simsakgija salode, a·sel ong·aia. Uni gimin simsakna nanganirang bang·a, uno PWD department maidake ramako design ka·enga aro pulisrang maidake traffic-ko regulate ka·enga, saobarangde chu ringe gari sale a·sel ong·enga, iarang gimikko regulate ka·na, dingtang dingtang responsibility-rangko niamo pangchake on·gimin donga.

Indakgipa kamrangko nirokna dingtang dingtang department-ni official-rang kamrangko chu·sokatna nanga. Uni gimin meeting-rangko ong·atengama, ong·atjaenga iarangko check ka·aha. Ia district road safety committee japrako meeting ong·atna nanga, da·al Tura Civil Hospital-ni doctor-rang aro Trauma Centre-ko nirokgiparang baksa meeting ka·ani ja·mano nikna man·aha, meetingkon changsaba ong·atkuja.

Uni gimin meeting ka·e, an·tangtangni responsible-ko chu·sokatna nanggen, ingipao ia program-ko ong·atenga. District road safety committee-ni meeting-ko ong·china didiangaha, da·o district road safety committee-ni member-rang baksa meeting ka·gen, ineba De.Sangma aganaha.