Shillong, Dec 27,2024: Meghalaya a·dokni gitcham Skotong Minister aro Trinamool Congress (TMC)-ni dilgipa Dr. Mukul Sangma, Congress party-ona re·bapilna sikani dongode, uko kusi ong·e rimchaksoaigen ine Meghalaya Pradesh Congress Committee (MPCC)-ni Padot Vincent H Pala parakataha.
Dr. Mukul Sangma, Congress-ona re·bapilna sikgenchimode, ua Tura-ni MP Saleng A. Sangma, MPCC-ni Working President Deborah C. Marak aro gipin dilgiparang baksa agangrikchengna nanggen ine MPCC Padot parakataha.
“Dr. Mukul Sangma gita dakgipa dilgiparangko Congress dolo man·taigenchimode, uamang kusi ong·begen,” ine Pala aganaha.
Dr. Sangma-ni Congress-ona re·bapilaniko Congress-ni High Command ra·chakchengna nanggen ine parakataha.
Dr. Sangma-ni re·bapilanichi Congress dol aiao inmangipa kamrangko ka·na man·genchim ine janapatengon, “Ua (Dr Mukul) Congress dolona re·bapilna gita maiko dakna nanga an·tangan ma·sia,” ineba Pala aganaha.
Dr. Mukul Sangma-ni gisepo maming neng·nikanirang dongja aro uamang sakgnian saksa sakgipinko mande ra·grikgiparang ong·a ine janapatenba, Congress dolde pilaknin ong·a ine MPCC Padot parakataha.
“Congress dolko rikpiltaina gita chinga kamko ka·na nangenga,” ineba ua aganaha.
Meghalaya a·doko Trinamool Congress (TMC)-ni dilgiparang, Congress dolona re·bapilna miksonganirang dongenga ine jangbingbanganirangko a·dokni gitcham Skotong Minister aro TMC-ni dilgipa Dr. Mukul Sangma raken jegalatskaaha.
Congress dolona re·bapilna miksonganirang donga ine jangbingbanganiko jegalatengon, ua Congress dolona re·bapilna miksongani dongja, indiba nanggenchimode, mikkangchi gital Political dolko bikotnaba donga ine Dr. Sangma parakataha.
Meghalaya a·doko Congress dolde miksongani grisa re·mikkangenga ine janapatenba, manderangni mikkangode pangnan Congress dolni dilgiparang dingtang dake aganronga indiba janggilode, NPP dol baksa melie kam ka·ani donga ine TMC dilgipa matnangatskaha.
KHADC-o NPP aro Congress dolgni bakrime kamko ka·engani gimin, ua an·tangde a·dokko riknasa miksonge kamko ka·enga ine Dr. Sangma parakataha.
Ia kamni bidingo MPCC-ni Padot Vincent Pala jak dongama ine sing·anina aganchakengon, ua darangkoba miksonge aganja, indiba ua da·o sorkariko chalaienggipa dolni kosakosa chakatenga aro NPP baksa Congress-ba jak donga ine Dr. Sangma matnangatskaha.
