Shillong, Mar 13, 2025: Meghalaya Legislative Assembly-ni Leader of Opposition (LO) ba warachakenggipa dolni dilgipa Dr. Mukul M. Sangma, a·doko chu dokkanrangko dakna licence on·anirangko dontongatchina sorkariko didiangaha.
Rama sepangrango chu dokkanrangko dakna on·engani gimin Dr. Sangma namnikgijaniko parakangenba, maini gimin chu palgiparangna licence-rangko on·daproroenga ine Dr. Sangma sing·doangaha.
A·doko chu dokkan dakgiparangna Licence-rangko nangana bate on·anichi dal·drobaenggipa chadamberangni Entrepreneur-rangko sorkari aro department ja·guatenga. Poraia matchotani ja·man, saniba didianiko man·e aro gipinrangni chu·sokaniko nike, an·tangtangni man·gnina rike bang·batan bon·chongdikenga ine Dr. Sangma sorkariko matangaha.
Iarang gimikko name niatgenchimode, rama samtangtangon chu dokkanrang bilongen bang·engaha, jekon dal·dalgipa Fashion Designer-rang baksa susaa gita nikpila ineba ua aganangkuaha.
Chu dokkan dakna sakantian dorgastorangko galenga aro chu dokkan-na licence-rangkoba on·enga, indide niam retirangko ja·rikengama ine Dr. Sangma sing·doangkuaha.
A·doko chu dokkanrang bang·roroengahani gimin, licence nokgiparang licence renew ka·na aro dokkan para-rangko gamna man·pijaengjok. Ian churangko palnangjani a·sel indakgipa obostarang ong·enga, maina ge 5 chu dokkan-ni palo ge 15 chu dokkanrang dongskaengaha ineba ua aganangaha.
Maini a·sel sorkari chu dokkan-na licence-rangko on·dapdapenga, chu dokkanrang chu·ongjaenga ong·osa ge·gipin chu dokkan-na licence-ko on·na nanga, ine ua aganadapangaha.
Bar-rangko chalaigiparang aro dokkanrangoniko ra·na re·bagiparangni bilsirangko nirokna gita niamrangko tarina nanga. Re·anggipa Me·gong Festival-o, samtangtangchin churangko palaha, a·daman bar gita dakpilaha ine Dr. Sangma aganangaha.
Je chadamberangan bilsi chu·ongkujachim, bar-rango nape chu ringanirangko nikna man·aha. Iani bidingo ning·tue chanchienba, chu dokkan-na licence on·anirangko dontongchina Dr. Sangma sorkariko didiangaha.
