Tura, May 29, 2025: Confederation of Meghalaya Social Organisation (CoMSO) aro Garoland State Movement Committee (GSMC), HQ Tura, Butbar salo Demdema C&RD block-ni ning·o bang·a tol·e tarigipa Job Card-ni bidingo complaint-rangko man·soani ja·man, Dadenggre Civil Sub Division-ni SDO baksa tom·e chanchirimaniko dakangaha.

Uamangni tom·e chanchirimanio, Demdema block-ni donggipa Maulakhandi GS Circle-ni ning·o bang·a manderang duplicate jobcard-rangko tarie jakkaltokenga, ine parakangenba, iandake niamni a·palo ong·gija duplicate jobcard-rangko tarianiara niamni a·palo ong·a ine dolgni NGO-rang, Civil SDO-na aganaha aro niamgri duplicate tarigipa jobcard-rangko nipiltaie rectify ka·china didiangaha.

NGO-rangni parakangani gitade, Maulakhandi GS Circle-o gitcham jobcard-na biming segatgiparang nokdang ge 630 mangsan dongaiachim, indiba bilsignini gisepon, jobcard-na gital biming segatgiparangko chandape nokdang ge 1000 bataha.

Iandake, niamni a·palo ong·gija, jobcard-na biming segataniara ra·chakna man·gijani ong·a, ine janapangenba, duplicate jobcard-na biming segatgiminko de·galpilchina aro duplicate jobcard-rangko biming segate on·gipa officer-rang aro VEC Secretary-rangni kosako raka ja·kurangko diangchina NGO-rang Civil SDO-ko didiangaha.

NGO-rangni didianga gitan, duplicate tarigipa jobcard-rang nipiltaie, uarangko den·galgen aro duplicate jobcard tarianio jak donggiparangko sandiatgen, ine Civil SDO ku·rachakataha.

Uni gimin, “A·chik a·songni namgnina chingni kam ka·anirango pilakan ching baksa bakrimpachina, A·chik a·songni manderangko NGO-rang mol·molataha”.