Resubelpara, Sept 6, 2024: North Garo Hills a·jani A·dokgre, Dobanggal songo Jal Jeevan Mission [JJM]-ni kamrangko matchotaha ine Completion Report-o songni President aro Secretary-ko SDO office-ona okamatenba, drae soi ka·ataha ine songni manderang koborna u·iataha.
Dobanggal songo JJM-ni kamrang matchotahaoba, chi tingtotsaba jokkuja, chi pipe-rangko nokantina sale on·genchimoba, chi jokjani gimin songni President aro Secretary soi ka·na jechakachim, indiba SDO drae soi ka·ataha. Je biaprango kamrang matchotkujachim, uarangko tarie on·china contractor-ko didigen, ine SDO songni President aro Secretary-na aganaha.
SDO-ni indakgipa kattarangko aganani gimin, songni President aro Secretary Completion Report-o soi ka·aha. Indiba da·alona kingkingba Dobanggal songo JJM-ni chi tingtotsaba jokkuja aro contractor-ba songona re·bae, kamrangko nirokea dongja ine songni manderang parakataha.
Dobanggal songo JJM-ni kamrang matchotani ja·man, chi jokjani gimin songni manderang chirongdik ba tank-ko nirokna aro chi wattimna chowkidar donchina aganon, SDO JJM scheme-ode, chowkidar dongja aro muster roll-koba rakkina man·ja ine aganchakaha.
Dobanggal songni Sordar, koborna talatani gitade, “Angko officer-rang chi wattimna aro tank-ko nirokna Mendipathar-o training on·aha. Training matchotani ja·man, officer-rang songona re·bae, jean training ra·ahachim, uan tank aro pipe-rangko nirokgen. Indiba ia kamko ka·engon, sorkari dormaha on·jawa, songni manderangan nokprako gong 10 ba 20 gilgrime, nittimgipa mandena dormaha on·china officer-rang aganaha” ine songni Sordar aganaha.
