Baghmara, .May 1,2025: April 30 tarik Butbar pringni 8 bajimango ma·sina man·gijagipa manderang, St.James Skulo poraienggipa me·chik bi·sa saksako rim·sruke ra·angna jotton ka·ahachim, ine Asugre OGC-o koborko man·soaha.

Koborna u·iatani gitade, ua a·sel Chokpot Pulis Station-ni ning·o donggipa Deku bajar sepango ong·aha. Indake ong·engon, Alagre songni manderang uamangko, mande rim·srukgiparang ine chanchichipenba, jinma rim·e Deku bajarona ra·angaha.

Ua obostani bidingo kobor man·soe, Chokpot-ni pulisrang bakan ua biapona re·ange sandianiko dakahaon, ua manderangara kenta menta ra·gipa gipin jatrang ong·achim aro ua manderang Deku bajaroni Rimrangpara-ona AS-18, AC-0357 tempo gario re·angengachim ine pulisrang ma·sina gita man·aha.

Kenta menta ra·gipa manderang Deku Diganggre rama bibraona sokahaon tempo gariko dongdipahaon, me·chik bi·sa saksa bus garioni ong·onaha aro bus gariba Tura-chipakna re·angaha. Uni ja·mano kenta menta ra·gipa manderang, an·tangtangni tempo gariko guraie Rimrangpara chipakna re·chakatbaaha.

Uko nike me·chik bi·sa, kenta menta ra·gipa manderangni gari guraie re·bapilako niksoe kenjagokaha aro an·tangko rim·sruke ra·angna am·enga ine chanchie, rang·san chrikeate grapenba Deku bajarona katangaha.

Uni ja·mano Tura-oni Chokpot-on re·baenggipa manderang, ua me·chik bi·sani grape katangengako nike, mai ong·a ine sing·enba, uamangni gario gate Deku bajarona rimangaha. Ua me·chik bi·sa Deku bajarona sokahaon, ong·gija chanchisrete an·tangko rim·sruke ra·angna rikbaa ine songtangni manderangna aganaha. Uni giminsa, Alagre songni manderang ka·onange, kenta menta ra·gipa sakbri manderangko rim·e, uamangni tempo garikoba Deku bajarona ra·angaha.

Ua obostani bidingo pulisrang sing·sandie niahaon, ua obostako ma·sisretesa badi ka·aha. Ua manderango maming namgija dakna miksongani sakkirang dongja ine nikaha. Indiba ua manderangko ong·gija chanchisretesa dos galaha ine South Garo Hills a·jani Superintendent of Pulis (SP) talataniko on·ataha.

Uni gimin, jolni manderang indake ong·gija koborko gipatjachina mol·molatenba, indakgipa kobor-rangko tol·e manderangna jangbingbangatjachina aro a·songni niamko ba law & order-ko ja·rikchina SP jolni manderangko didiataha.