Tura, April 4, 2025:Nokrek Area Development Committee (NADC), Darengre-oni Durabanda songona rama tarianiko name nirokjaengani gimin, ua ramako niam gita tarijaenga ine parakatenba, PWD (Roads) Tura North Sub-Division No. 1-ni Assistant Executive Engineer aro official-rangni kosako West Garo Hills a·jani Deputy Commissioner-na badi ka·doangaha.

NADC-ni Joint Secretary Salseng N Marak-ni parakatani gitade, Darengre-oni Durabanda songona dakanggipa ramara dingtang dingtang songrang aro manderangni game ge·e cha·enggipa biaprangona dakanggipa rama ong·ani gimin, bang·a songni manderang ua ramao pangchake janggi tanggiparang ong·a. Songni manderang, ua rama gitan an·tangtangni game ge·e man·gipa bosturangko palna sim·na re·ruraenga aro pilak kamrangan ua rama gitasa re·ruratokengachim.

Uan kutcha ramasa ong·ani gimin wachini somoiode ramarang re·na namsrangja aro sagipa manderangko hospital-rangchi ra·angengon, sagipa manderang ramaon, janggi galronga, unbaksana skul aro college re·enggipa, office-rango kam ka·enggipa manderang wachini somoiode rama namsrangjae, re·na man·rongja ine NADC parakataha.

Ua ramako tarichina ru·uta bilsirangna ua jolo songdongenggipa manderangni dabianiko sorkari knachakenba, ua ramako pilak karirangon choligipa rama dake tarina krorni kror tangkarangko chamataha ine Marakjanapataha.

Ua ramako ‘New Nano Technology Soil Stabilisation’ minggipao pangchakesa tarina nangani gimin ramako tarianio saksa kamni gimin ma·sigipa official-kosa nangachim, indiba, ua ramako tarianio department-ni technical official-rang gri contractor-ni labour-rangsa an·tangni sika gita tarienga.

Iani bidingo chinga PWD (Roads) Tura North Sub-Division No. 1-ni Assistant Executive Engineer aro official-rangko, nirokchina didiahachim, indiba uamangoni darangba kamrangko nirokna gisiko nangjahani gimin maibakae ramako taria namjani a·sel manderang sina nanggenchimode, garirang a·sel ong·na nanggenchimode, ramarang ta·raken nosto ong·na nanggenchimode, official-rangkon dai ong·gen, ine NADC-ni Joint Secretary parakataha.