Tura, Nov. 3, 2024: Pangna bilsi manirongbaenga gita ia bilsioba chang 48-gipa 100 Drums Wangala Festival ba Dama Bol 100-ko Doke Wangalaniko re·baenggipa November 7 tarikoni 9 tarikona Wangala A·dam Chibragre-o ong·atenga.
Dam bol 100-ko doke Wangalaniko bilsiantian Hundred Drums Wangala Festival Committee (HDWFC) ong·atenga aro ia Wangalaniko HDWFC baksa Tourism Department, West Garo Hills District Administration aro gipinrang bakrime ong·atanggen.
Ia bilsioba Dam Bol 100-ko doke Wangalaniko ong·atanio, Contemporary Folk Song Competition, A·chikrangni ring·anirang jekai Harara, Nanggorere, Serejing Wal·jan, Sonatchi Kalsin, Gogaiwai Gogaiwai, Ang’ Atchiram A·songtang Garo Hills, Chanchiate Aman A·songko, An·sengriri Aiao Angade, Akai Dira, Mewek Mewek Mikoa, Hai Anga Dania aro uandakgipa ring·susaanirangko ong·atgen ine parakataha.
Classic Folk Song jekai Ajea, Doroa, Dama Doksusaa, Grika aro uandakgipa program-rangkoba Dama Bol 100-ko Doke Wangalanio ong·atanggen. Bilsi gimiko game ge·e man·gipa mi misina Pattigipa Ra·rongipa Misi Saljong-ko mittelpilani gita bilsiantian A·chikrang Wangalaniko dakrongbaenga aro ia dama bol 100 doke Wangalaniko ru·uta bilsirangonin manirongbaenga.
Apsandake ia bilsioba Dama Bol 100-ko Doke Wangalanio dingtang dingtang songrangoni dol 10 Wangalgipa dolrang bakko ra·anggen aro una agreba, gipin a·songni manderangba re·bae bakko ra·anggen ine ka·dongsoenga.
