Tura, June, 27,2025: West Garo Hills a·jani Dalu C&RD Block-ni ning·o donggipa Dingkajora songo, Pradhan Mantri Awas Yojana (PMAY)-ni namgniko man·enggipa manderangoniko Village Employment Council (VEC)-ni Secretary aro Gram Sevak, tangka gile ra·enga ine A·chik Dedicated Integrity Leaders (ADIL) parakataha.

ADIL-ni parakatani gitade, Dingkajora songo PMAY-ni namgniko man·enggipa manderangni badi ka·anirangko man·soenba, ADIL-ni dilgiparang songona re·ange, sing·sandianiko dakon, PMAY Scheme-ko man·enggipa songni manderangoniko gong 500 sanikoba gong 1000 ka·e Gram Sevak-na on·china, VEC-ni Secretary an·tangan bi·e ra·angronga ine songni manderang parakataha.

“PMAY low cost nokko rikna bang·gija tangkarangkosan man·enga aro nok rikna tangka chu·ongjani giminan, mitam manderangde, wak matchu palna, bagan barirangko bondok donna nangpilenga. Indake ong·genchimoba, manderangni neng·nikanirangko VEC-ni Secretary aro Gram Sevak ma·sichakja ine matnangataha. Gram Sevak-na sorkari dormaha on·enga, indide songni manderangoniko maini gimin tangka dabie ra·na nangenga” ine ADIL-ni dilgiparang sing·doatenba, VEC-ni Secretary aro Gram Sevak-ni kamko raken jegalataha.

ADIL-ni parakatani gitade, VEC Secretary-ni term-ba bon·ahani gimin, Dingkajora VEC-na gital Secretary-ko seokna gita songni manderang changbrina kingking Block Development Officer (BDO)-na chitti sedoatahachim, indiba songni manderangkosa ua ka·mikkenatpilaha ine songni manderang parakataha.

“Saksa officer ong·e, maini gimin ua manderangna dakchakna sikja aro maini gimin songni manderangkosa ka·mikkenatpilna nangaha. VEC Secretary-na dongimin term bon·ahani giminsa gital Secretary-ko seokna songni manderang election ong·atchina mol·molahachim. Indiba maini gimin election-ko ong·atgija songni manderangkosa ka·mikkenatskaenga” ine ADIL sing·doatenba, BDO-ni indakgipa kamko raken jegalataha.

Iani bidingo ADIL nanga gita ja·kurangko de·anggen aro dos donggipa official-rangni kosako ja·kurangko de·e sorkario dabianggen ine ADIL parakataha.