Tura, July 6,2025: West Garo Hills a·jani a·kawe jolo donggipa, Phulbari Masangpani aro Nimaikata songrango niamgri chalaienggipa saw-mill-rangko Civil Society Womens’ Organisation (CSWO), Garo Hills Region-ni President Ma Jaynie Sangma Sonibar salo rim·enba, bol ratani machine-ko ra·sekaha aro Phulbari-o donggipa GHADC Range Office-na pakwatataha.

A·kawe jolrango niamgri bang·a saw mill-rangko chalaienga ine koborko man·soani bakan, Ma Sangma sandina gita re·angaha aro Phulbari sepango donggipa Nimaikata songo niamgri chalaienggipa saw mill-ko nikeaha. Indake ua saw mill-o bol ratenggipa machine aro bolrangko ra·seke GHADC Forest office-na pakwataha.

Uni ja·mano Masangpani songo saw mill ge·gniko chalaienga ine koborko man·e, uko sandiangon, machine-rangko oke katsoaha, indiba bolrangkode sale katna man·srapjae, gale katangaha. Ua bolrangko seize ka·e, Phulbari GHADC Range Office-na pakwataha. Uandake, Phulbari Range Office-ni Ranger aro kam ka·rimskarang re·bae, rim·gimin bolrangko pickup garirangko ra·bae salangatokaha. Indake saw mill damgittamni chu·gimik bolrang pickup 32-ko Phulbari Range Office-ona salangaha.

A·kawe jolrango niamgri bang·a saw mill-rangko chalaie, Garo Hills-ni bolrangko nosto ka·engani a·sel, buringni chiring chibikrang tipangengjok aro ringani chirangko man·na neng·engjok ine Ma Sangma parakatenba, Garo Hills-o songdongenggipa manderang sakantian songtangtango bol-wa·arangko ripinge, chiring chibisikrango bolrangko ge·dapchina aro bol cha·ugiparangko nie dongaigija rim·enba, pulusna badi ka·china didiataha.