Ampati, June 17, 2025: Civil Society A·chik Welfare Organisation (CSAWO) HQ. Ampati, Sombar salo niamgri Bangladesh a·songona ro·ong salruraengani bidingo, South West Garo Hills a·jani Deputy Commissioner-na badi ka·e lekka sedoangaha.

CSAWO-ni DC-na seatgipa chittio janapatani gitade, Garo Hills-ni ro·ongrangko niamgri bikote, Bangladesh a·songona watatanirangko ta·rake dontongatchina, DC-ko didiangaha.

South West Garo Hills a·jao songdongenggipa manderang mongsongbate, salanti skul re·ruraenggipa chatro chatrirang aro sagipa manderangko sanna banna gita hospital-rangchi ra·anganio, ro·ong salgipa garirang rama samtangtangon, gari re·na jokpilgija neng·take dongani a·sel, ta·rake re·angna nanggipa nanggipa manderang namen neng·nikanirangko man·tokenga aro nangana bate truck garirango ro·ongrangko gatprete salengani gimin rama jal·langrangko nosto ong·atenga, ine CSAWO-ni President Tryans Ch.Marak parakataha.

“Mitam biaprangode gari re·na man·pilgija ro·ong salgipa garirang ramarangko champenge dongani a·sel, jolni manderang re·a doanirangk neng·nikanirangko chagrongna nangenga” ine CSAWO suk ong·gijaniko parakataha.

“Chingni DC-ko gronge agangrikanio iandake niamgri ro·ong salruraani bidingo ta·raken nirokatgen, ine DC chingna ku·rachakataha” ine CSAWO-ni President parakataha.

Bangladesh a·songona niamgri ro·ong salruraanirangko niam gita salja ong·ode, CSAWO nie dongjawa, mikkangchi rakbata ja·kurangko de·anggen, ineba Tryans Marak parakataha.