Shillong, Nov 18, 2024: Manipur a·doko so·sojengjeng ong·anirang batroroenga gimin, Manipur a·doko Skotong Minister ong·e dilenggipa N.Biren Singh-ni sorkario bakrimaniko ra·pilna gita National People’s Party (NPP) Robibar salo tik ka·aha.

Manipur-o so·sojengjeng ong·anirang namchipjaengani bidingo BJP-ni National President Jagat Prakash Nadda-na seachi u·iatenba, Manipur a·doko obostarang namjabatroroengani gimin uamang suk ong·gijaniko parakatenba, Manipur-o Biren Singh-ni dilenggipa sorkario bakrimaniko ra·pilna tik ka·aha ine NPP-ni National President Conrad K Sangma parakataha.

“Re·anggipa 2023 bilsini May jaonin Manipur a·doko so·sojengjeng ong·anirang batroroengani a·sel bang·a manderangni janggirang gimaaha aro manderangni neng·nike janggi tanganiko chinga nikaha” ine Conrad Sangma parakataha.

Manipur a·doko ong·enggipa kajiarangko namatna aro tom·tomaniko ra·bapilna gita Manipur a·dokni Skotong Minister N.Biren Singh-ni dilenggipa sorkari chu·sokgipa ong·na man·jaha ineba NPP-ni National President suk ong·gijaniko parakataha.

“Manipur-o ong·enggipa obostarangko nike chinga Manipur a·doko BJP-chi dilenggipa sorkario bakrimaniko ra·pilna tik ka·aha” ine Meghalaya a·dokni Skotong Minister aro NPP-ni National President Conrad K Sangma, BJP-ni National President-na sedoatgipa chittio parakataha.