Shillong, Sept 8,2024: Meghalaya a·dokko Congress nokdangni dilgiparang Vincent H Pala-ni Skotong ong·e dilanichi dilgiparang komirikrikangani gimin, Meghalaya Pradesh Congress Committee (MPCC) President-ni kosako adita jijaanirang ong·tokenga ine koborko man·aha.

Batanggipa salrango Congress dol a·doko bilakgipa ong·achim, indiba da·ode Congress-ni obosta namjabatroroengaha. Re·anggipa 2021 bilsini August ja dipet Vincent Pala MPCC-ni President ong·e kamko jako ra·aoni Congress dolo meligrikgijanirang ong·kataha.

Indake, 2022 bilsio a·dokni gitcham Skotong Minister Dr. Mukul Sangma-ko manchape sak 12 Congress MLA-rangko gimataha, uamang Congress-oni ong·kate Trinamool Congress (TMC)-o napangskaha.

Uni ja·mano sak 5 MLA-rangko ra·galaha, uamang 2023 bilsini Assembly election-na skang Congress doloni ong·kate, gipin dolo napangaha. Ua sak 5 MLA-rangko NPP-ni dilenggipa sorkarina chakpaani gimin a·rikgalaha.

Re·anggipa Assembly election matchotani ja·man, Khasi Hills Autonomous District Council (KHADC)-oni bang·a Congress MDC-rang NPP-o napangaha.

Unbaksana re·anggipa jao sakgittam Congress MLA-rang Celestine Lyngdoh, Gabriel Wahlang aro Charles Marngar NPP-o napaha. Da·ode Congress MLA Ronnie V Lyngdoh saksamangmangsan dongaiaha. Sakgittam Congress MLA-rangni NPP-o napangon, Vincent Pala, MPPC-ni President ong·aoni ong·katna nangachim ine mitam Congress dilgiparang aganaha.

“Congress dolo indita so·sojengjeng ong·engoba, Vincent Pala kamtangko jako ra·kuenga, dolko bilake aro apsan ong·e rakkina man·jahani gimin Pala, MPCC President-oni ong·katna nanga” ine Congress dilgiparang aganaha.

Congress dolko tangchaatpilna nangenga, maina KHADC aro JHADC-ni election sepangengahani gimin, AICC, rakgipa ja·kuko de·na nangenga, uni gimin Congress dolna gital President-ko nangenga ine Congress dilgiparang parakataha.